Dáhttu ásahit Innovašuvdna Sámi

Váilevaš kapitála ja investorat Sámis leat stuora hástalussan sámi ealáhusaide. Danne árvala ge Bargiidbellodaga sámediggejoavku ásahit sierra Innovašuvdna Sámi – ásahusa mii ovddidišgoahtá sámi ealáhusaid.

– Dat nannešii sámi fitnodagaid ja dat maiddái márkanasttášii veahkkin sámi ealáhusaid ja Sámi mátkkoštanbáikin. Nana ealáhusat sihkkarastet maiddái sámi servodaga ja sámi guovlluid ássama, celkkii Bargiidbellodaga sámediggejoavkku Ronny Wilhelmsen Sámedikki sárdnestuolus maŋŋebárgga dievasčoahkkimis.

Sámediggi doarjjui BB

Bargiidbellodat ovddidii ášši ođđa dievasčoahkkináššin. Sámediggeráđđi doarjjui ášši ja dáhttu bargat dainna viidáseappot. Wilhelmsen lea hirbmat duhtavaš go Sámediggeráđđi doarjjui evttohusa. 

– Lean hirbmat duhtavaš go eanetlohku oaidná min politihkalaš jurdagiid, ahte áigut nannet sámi ealáhusaid ja nu sámi servodaga ja sámi ássanguovlluid. Dan sáhtášii jođánit ásahit jus lea dáhttu. Innovašuvdna Sápmi sáhttá leat jođus jagi – guovtti jagi geahčen, muhto in dieđe vuoruha go ráđđi dan nu jođánit. 

– Rahpasit olu vejolašvuođat

Wilhelmsen jáhkká Innovasjon Sámi nana buorre ásahussan, go dálá dilis ii leat Sámedikkis doarvái ruhta ealáhusovdáneapmái. Sámediggi maiddái lea gáržžidan juolludanortnega 31 suohkanii.

– Dál han mii galgat “Šattolaš Sámi” ealáhusdieđáhusa gieđahallat. Sámedikkis lea beare unnán ruhta Sámi viidodaga ektui. Mis lea politihkalaš jurdda movt sáhttá fátmmastit eambbo suohkaniid. Innovašuvdna Sámiin lea vejolaš viiddidit juolludanortnega guovllu, go dalle ii leat Sámediggi okto ruhtadeamen prošeavttaid. Dalle sáhttá ovttasbargat ruhtajuolludemiid ektui ovdamearkka dihte Innovašuvdna Norggain, lohká son.  

Innovasjon Sápmi sáhtášii háhkat eambbo kapitála ja maiddái juogadit goluid Innovasjon Norggain dahje eará ruhtagálduiguin. Wilhelmsenis leat juo jurdagat movt Innovašuvdna Sámi galggašii organiseret. 

– Innovašuvdna Sámi sáhttá organiseret ovddeš ovddidanfoandda láhkai, nu ahte mihttomearrin lei boaittobeale báikkiid nannet. Innovašuvdna Sápmi sáhtašii leat ovttasbargu Sámedikki, Sámi ealáhussearvvi, Innovašuvdna Norgga, Interreg, dutkan- ja oahpahusásahusaid, sámi ealáhusaid, fylkkaid ja eará ruhtagálduid gaskkas, árvala son. 

– Sáhttá šaddat olles Sámi prošeaktan

Álggus galggašii Innovašuvdna Sápmi fátmmastit Norgga. Áiggi mielde oaivvilda Wilhelmsen ásahusa sáhttit fátmmastit olles Sámi ja šaddat riikkaidrasttildeaddji prošeaktan, man hárrái ovttasbargat eará Sámedikkiiguin. 

– Sámediggeráđis galggašii váldoovddasvástádus Innovašuvdna Sámis. Innovašuvdna Sámi hálddahus ja čállingoddi fas galggašedje ásahuvvot Sámediggi hálddahusa vuollásažžan, árvala son. 

Čále cealkámuša

Your email address will not be published. Required fields are marked *