Boazodoallostivra ii meannut ovttage ášši ođđasit

Eanandoallo- ja biebmodepartemeanta ii mieđit makkárge boasttuvuođaid leamaš Boazodoallostivrras, vaikko stivrras eai leat čohkkán sámiid válljen stivrralahtut.

– Ii leat duohta nugo SÁMi ođasmagasiinna redaktevra lohká, ahte Boazodoallostivrras ii leat sámi duogáš. Ovtta stivralahtus lea sámi ja boazodoallofágalaš duogáš, čilge Eanandoallo- ja biebmodepartemeantta stáhtačálli Widar Skogan SÁMi ođasmagasiidnii. 

– Boazodoallostivrras lea mearridanváldi

Skogan ii oainne stivrras váilut mearridanváldi, vaikko sámi stivralahtu ii leatge válljen Sámediggi, muhto baicce stáhta. Son čujuha Boazodoallolága § 71, mas daddjo ahte Boazodoallostivrii nammadeanes galgá deattuhit geográfalaš viidodaga, máŋggabealat fágalaš duogáža ja servodatvásáhusa. Lágas maid daddjo ahte stivralahtuid searvvis galget aktiivvalaš boazodoallit. Skogan mielas departemeanta lea čuvvon lága nu guhká go dan ovtta lahtus lea boazodoalloduogáš ja vaikko stáhta leage nammadan stivralahttu.

– Boazodoallostivra lea buorre ja viiddis kollegalaš ja stáhta hálddašanorgána, masa hálddašanláhka gusto.  Dálá stivrras lea iežas instruvssa vuođul mearridanválddálaš. Danne ii leat vuođđu meannudit áššiid, mat leat meannuduvvon ja mearriduvvon stivrras mas leat njeallje lahtu, maid stáhta lea válljen.

Duhtavaš go Sámediggi fas searvá

Departemeanttas dattege leat hirbmat duhtavaččat go stivra dál šaddá ollisin fas.

–  Eanandoallo- ja biebmodepartemeanta oaidná positiivan go dál leat ovttas Sámedikkiin proseassas nammadit lahtuid 2019-2021 Boazodoallostivrii. Ulbmil lea ahte ođđa stivra lea sajis suoidnemánu 1. beaivve. 

Norgga Eanandoallodirektoráhta boazodoalloossodaga direktevra Liv Berit Hætta ii dáhto vástidit leat go direktoráhta beales oaidnán hástalussan go sámiid válljen stivralahtut leat váilon. Son ii maid loga iežas rievttes olmmožin vástidit dasa.

Čále cealkámuša

Your email address will not be published. Required fields are marked *