Besse goarrut lávdebiktasa Ella Mariei

Symesterskapet lea NRK hirbmat beakkán tv-ráidu, mas gilvalit goarrumis. Go Ella Marie Hætta Isaksen fáhkka iđistii guossin, de besse bivttasgoarrut duođaid hástalit iežaset sámi bivttashábmemiin.

GOVVEN: NRK Symesterskapet, Eivind Senneset

– Lei oba gelddolaš goarrut biktasiid, main lea sámi inspirašuvdna. Ledjen sávvan ahte beasašin lávdebiktasiid goarrut, ja go de Ella Marie iđistii, de illudin. Lávdebiktasiid hábmen lea nu suohtas, go de beasat duođaid stoahkat ja geavahit hutkáivuođa. Go sihte min Ella sámevuođa velá nannet, de šattai oalle gelddolaš hástalus, lohká Symesterskapet oasseváldi Kristin Vaag, gii vuittii prográmma oasi, mas hábmejedje Ella Mariei lávdebiktasiid.

Ella Marie Hætta Isaksen válljii lávdebiktasa, maid Kristin Vaag lei gorron. Dasa gullet čáhppes buvssat ja jáhkka, main leat sámi hearvvat, ja vel boagán mas vuhtto sámi inspirašuvdna. Biktasat ledje nu vuohkkasat ja erenoamážat ahte stuora násti lohká daid áinnas geavahit lávddis.

Ella iđistii fáhkka

Šattai hui ealas go sámi násti ja Stjernekampvuoiti Ella Marie Hætta iđistii gilvvuide barggaheaddjin. Sii ožžo ođđa hástalusa: Moatti diimmus goarrut sámi inspirašuvnna vuođul lávdebiktasa stuora artistii.

 – Mun in láve liikot čuvllaide. In ain juo dakkár oanehis vuolppuide go de oidnet visot go lean lávddis. Galgá sámi inspirerejuvvon bivttas ja dáinna galggan sáhttit lihkadit lávddis, čilgii Ella Marie NRK Symesterskapet-tv-gilvvu oasseváldiide. 

Go prográmma álggii árabut dán čavčča, de dasa serve logi asttuáigegoarru. Dađistaga go sii gorrot ja čovdet bargobihtáid, mat gáibidit sihke snáhppilvuođa, hutkáivuođa ja kreativitehta, de duopmárat čuldet sin ovttaid mielde ja geahččit čuvvot gealdagasas geat ain besset viidáseappot gilvvus. Juohke vahkus de gártá muhtin máhccat ruoktut. 

Sámi inspirašuvnnain goarrun šattai vel erenoamáš hástaleaddjin, go oassálastit eai lean nu oahppásat Sámiin, eaige beassan geavahit interneahta. Nu sii šadde válljet sihke liinniid ja goarrunávdnasiid, ja viđa diimmus goarostit lávdebiktasa Ella Mariei olggobeale veahki haga.

– Mun liikon 80-logu bivttashámi ja eanaš mu biktasat leat ádnon biktasiid gávppiin oston. Lávdebivttas galgá leat redesign ja dat galgá leat sámi inspirerejuvvon, čilgii Ella Marie duojáriidda.

– De dál livččii galgat dat Google. In dieđe nu olu sámi kultuvrra birra, jietnadalle oasseváldit.

Duojár bođii veahkkin

Oasseváldit besse dattege sámi duojáriin deaivvadit. Duojár muitalii sámi duojis ja skeŋkii maid seahka dievva gáktehearvvaid oassálasttiide. Duojárat maid besse moadde minuhtta gažadit Ella Marie ovdalgo goarrugohte.

Kristin Vaag

Kristin Vaag (29) lea Troanddimis eret ja ássá dál Oslos. 2017:s son oaččui skeaŋkan goarrunmašiinna ja dan rájes lea duodjemáilbmi njiellan su ollásit. Duodji šattai nu dehálažžan sutnje ahte heittii barggustis, go beasai searvat Symesterskapetii. Ella Marie bargobihtá Kristin čovddiige buoremusat ja stuora sámi artista liikui su duddjon čáhppes buvssaide, main leat sámi hearvvat ja Sámis inspirerejuvvon boahkánii. Nu bures ahte válljii Kristin lávdebiktasa.

– Álggus orui hui váttes bargu dát, erenoamážit go dovden ahte mus ii leat doarvái gelbbolašvuohta sámi kultuvrras. Ballen “duolmmastit boastut”. Go de duojár Jorunn Løkvold bođii čájehit ja čilget sámi duoji, dat álkidahtii barggu. Duođaid ožžon inspirašuvnna dán barggus ja duojisge, lohká Vaag.

Viđa diimmus goarrut

Viđa diimmus galggai lávdebivttas gárvánit. Dán áiggis eai nagodan buohkat olahit iežaset plánaid, muhto dat ii vuhtton Ella Marie catwalkas. Son beasai čiŋadit máŋgga ivdnás biktasiin, main lei sámi inspirašuvdna, ja Ella Mariei šattai loahpas váttis válljet. 

– Jáhkká maid leat gorron lea nu “mu jáhkka”. Liikon ahte sáhttá geavahuvvot guktot bealde, illudii ja rámidii Ella Marie, gii šleaŋggáhalai ođđa lávdebiktasiin.

– Dát gal lei duođaid somás bargobihttá. Lei hirbmat somá goarrut biktasiid sámi inspirašuvnnain. Dasa gal duođaid liikojin ja lea stuora gudni go Ella Marie háliidii mu biktasa geavahišgoahtit lávddis. Duođaid illudan dasa, lohká goarru ja Symesterskapet oasseváldi Kristin Vaag.

Ávžžuha earáid ge searvat

Ella Marie vulggii ruoktot ođđa lávdebiktasiinnis ja Kristin, gii ii leat goassege ovdal dahkan sámi inspirerejuvvon biktasiid, beasai joatkit gilvvus. Son ráfáidahttui olles vahkkui ja duopmár guovttes Jenny Skavland ja allaoahppan bivttasgoarru Andreas Feet eaba beassan su sáddet ruoktot dán vahku. 

Dá leat eará lávdebiktasat, maid gilvaleaddjit gorro Ella Marie Hætta Isaksenii Symesterskapet-goarrunráiddus.

– Lean oaidnán gova, mas Ellas lea mu goarrun lávdebiktasat badjelis. Lei oba somá oaidnit. Son lea nu fiinnis ja sávvamis beasan “live” ge oaidnit su lávddis, lohká Vaag ja ávžžuha olbmuid dieđihit iežaset Symesterskapet gilvvuide.

– Lea leamaš duođaid stuora vásáhus searvat dán tv-ráidui. Ledjen beannot jagi dušše gorron, nu ahte lei sihke riggodahkan, hástalussan ja eanaš suohtas searvat. Duođaid ávžžuhan earáidge searvat, lohká son.

Ella Marie Hætta Isaksen čájáhalai iežas gávtti oasseváldiide vai oččošedje inspirašuvnna go goarrugohte sutnje lávdebiktasa.

Symesterskapet oainnát NRK 1:žis juohke gaskavahku ja duorastaga dii 19.45, ja dieđus neahtta-tv:s maid. Juohke jagi Symesterskapet buvttadeaddjit hástalit maiddái sámiid dieđihit iežaset gilvui.

Čále cealkámuša

Your email address will not be published. Required fields are marked *