BeskánLuossaRock ii leat vel mearridan jotket go – Čoaskkis ja unnán ruhtadoarjja.

Dálki ja ruhtadeapmi dahke ahte festivála ii šaddan nu mo ledje sávvan. Danne BeskánLuossaRocka joavku čohkkeda dál árvvoštallat jotket go ain festiválain.

– Mii leat beanta duhtavaččat. Bearjadaga lei čoaskkis ja biegga ja lávvardaga beaivet ii lean nu fiinna dálki. Firtii lihkus go konsearttat álge, ja nu nagodeimmet goit geasuhit 350 olbmo konsertii. Dat lea moaddelogi olbmo unnit go diibmá, čilge BeskánLuossaRock-festivála jođiheaddji Stig Arne Somby.

Vaikko eai lean eambbo olbmot dán jagi, de ii gártan festiválii vuolláibáza nugo diibmá. Sudja dasa manne festivála cevzzii dán jagi buorebut go diibmá, lea danne go festivála dáhtui seastit ruđa.

– Mii leimmet bovden ovtta unnit čuojaheaddji joavkku dán jagi ja nu ii lean prográmma seamma stuoris go diibmá. Dán jagi leimmet maid šaddan skáhppot hálbbit teknihkalaš rusttegiid vai festivála hálbu. 

Kajsa Balto lea Bieskkenjárggas eret ja rámiduvvui hirbmadit. – Kajsa orru dál ođđa nástin šaddame Sámis, lohká BeskánLuossaRock-festivála jođiheaddji Stig Arne Somby. Govven: Lemet Arne Guttorm Graven

Sávve eambbosiid boahtit

Sančuari, Kajsa Balto, Ivan Buljo, juoigit Ingá Márjá Sarre, Biret Risten Sara, Máret Sara, Rávná Anti Guttorm ja Inga Berit Sara dat guoimmuhedje lávddis. Vaikko festivála lei bovden albma váldogeasuheaddji Sančuari, de ii šaddan gehččiidmenestus.

– Guovdageainnus ge ledje boahtán festiválii, muhto dieđuge livčče sáhttán eambbosat boahtit. Mun dieđán, ahte Guovdageain olbmot jáhkket festivála leat suhkkes meahcis ja ahte jáhkket dohko váttis beassat. Mii fertet čeahpibut márkanastit movt festiválii beassá jus mii joatkit. Mis han oainnát lea festiválabusse ja dat han lea hirbmat álkes vuohki beassat festiválii. 

Uhca gilážis, Bieskenjárggas, 19 km Kárášjoga guovddážis dat fuomášedje moatte jagi áigi lágidišgoahtit festivála. 

– Maiddái Sis-Finnmárkkus ge dárbbašit čielga sámi festivála geasi áiggi. Mun sávan ahte mii nagodat bisuhit fálaldaga, go min festiválii lea dárbu. Veahkehivččii olu jos oččošeimmet lasi festiváladoarjaga. 

Sančuari láve geasuhit oba olu olbmuid festiválaide. Vaikko eai lean go birrasiid 350 olbmo konsearttas, de dolle hirbmat eallima, go Sančuari lávkii lávdái. Govven: Lemet Arne Guttorm Graven

Beare unnán ruhtadoarjja

Sámedikki 2019 bušeahtas geavahuvvo oktiibuot 5,85 miljovnna ruvnnu sámi festiválaide. Das oažžu Riddu Riđđu 1,2 miljovnna, Guovdageainnu beassášfestivála oažžu 1,5 miljovnna, Márkomeannu váile miljovnna ruvnnu ja Kárášjoga beassášdoaluide juolluduvvo ges badjelaš 800 000 ruvnnu. Somby sávašii ahte sidjiide goaikkehivččii veahá eambbo boahtte jahkái.

– Mii oažžut 126 000 ruvnnu fásta doarjaga Sámedikkis, muhto dat ii leat doarvái bisuhit festivála dan dásis go lea. Vaikko mis lea unnit festivála go earáin, de lea seamma olu bargu. Earáin leat bálkáhuvvon bargit festiválas. Mii dahkat visot nuvttá ja dat mearkkaša ahte eat nagot plánet ja márkanastit festivála buori áiggis ja dasto eat nago stuorrut. Jus okta sáhtašii dáinna bargat, de livččii stuorát potensiála. Mii áigut dál evalueret festivála go orru ahte gili olbmot leat veahá váiban, lohká Somby.

Árvvoštallet loahpahit festivála

BeskánLuossaRock lea jurddašallan máŋga čovdosa movt bisuhit festivála.

–  Ii leat sihkar ahte joatkit jus eat fidne lasi doarjaga. Jus joatkit seamma ruhtadiliin de árvvoštallat rievdadit olles festivála. Soaitá leat ahte fertet oččodit eambbosiid mielde jovkui. Soaitit dušše juohke nuppi jagi lágidit konsearttaid ja dušše oaggungilvvuid lágidit jahkásaččat. Mii eat dieđe vel, muhto mii fertet leat realisttalaččat. Festivála lágideapmi lea áddjás bargu ja geavahit olu resurssaid dasa. Eat han galggaše šaddat noađđin olbmuide. 

Sámediggeráđi Henrik Olsen diehtá máŋgga smávva sámi festivála rahčat ekonomiijain. Vaikko ii sáhte lohpidit eambbo ruđa BeskánLuossaRockii, de lohká son ná: 

– Sáhtán lohkat ahte Sámediggi diehtá smávva festiválaid rahčet ja ahte sis leat hástalusat. Mis lea dáhttu veahkehit festiválaid ja geahččat movt dan sáhttit dahkat. In sáhte lohkat dál nu hirbmat olu, earet go ahte Sámediggi oaidná sámi festiválaid hirbmat dehálaš arenan, lohká Olsen. 

Vaikko ekonomiija hehttii BeskánLuossaRock olu, de festivála jođiheaddji lea beanta duhtavaš. Erenoamážit Kajsa Baltoin lea hirbmat rámis.  Kajsa Balto gullá Bieskenjárgii, muhto ássá Oslos. 

– Kajsa orru dál ođđa nástin šaddame Sámis. Son lea nu olu ovdánan dan rájes go son maŋimuš galledii BeskánLuossaRocka. Sihke gielalaččat, teknihkalaččat ja lávdegeavaheami dáfus lea sakka buorránan. Mis lea stuora doaivva sutnje ja olbmot liikoje su guldalit, lohká Somby.  

Bearjadaga lei čuoikapárkkas oalle eallin. Lei gal čoaskkis ja biegga, nu ahte dáide leat eanet olbmot go divrrit. Govven: Jan Skoglund Paltto 
Govven: Jan Skoglund Paltto
Govven: Jan Skoglund Paltto

Leave a Reply

Your email address will not be published. Required fields are marked *