Beassá neaktit Norgga Nationálateáhtera lávddis

Eila Ballovara Varsi ii lean go viđajahkásaš go álggii Deanu mánáidteáhteris neavttášit. Dál lea 18 jagi boaris ja neaktá fargga Norgga Nationálateáhtera ja Sámi Našunálateáhter Beaivváža lávddis.

– Ledjen oassi Sámi mánáidteáhteris logi jagi (2006-2016). Olles mánnávuođa nekten. Dan maŋŋá mearridin ahte in hálit dušše dahkat dan astoáiggedoaibman, muhto háliidan dahkat karrieara das. Dasto mun válljejin drámásuorggi joatkkaskuvllas, ja lean aiddo geargan dainna. Oktiibuot dat šaddet 13 jagi, muhto dát lea vuosttaš háve go beasan neaktit ámmátteáhterjoavkkuin, dadjá 18 jahkásaš Deanu nieida gii dál bargá Sámi Našunálateáhteris, Beaivvážis

Fáhkka riŋgii teáhterhoavda

Sámi Našunálateáhter Beaivváš lea olles leavttuin ráhkkaneame dán čavčča álgočájálmassii, mii lea historjjálaš ovttasbargu Sámi ja Norgga Našunalateáhtera gaskkas. Teáhter lea bargame bihtáin Human Zoo, man Kathrine Nedrejord lea čállán. 

Eila, hárjánan Beaivváš-neavttár Mary Sarre ja Human Zoo bihtá bagadalli ja bivttas- ja lávdehábmejeaddji, Bård Lie Thorbjørnsen, geahčadit ovttas  giehtačállosa.  Govva: Sámi Našunálateáhter Beaivváš

Dán bihtás Eila neavttaša sámi beakkán neavttáriiguin: su bargoskihpárat lávddis leat Mary Sarre, Nils Henrik Buljo, Marte Fjellheim Sarre ja Anitta Suikkari. Dasa Eila illuda, go son ii lean vuordán ahte teáhterhoavda sutnje riŋge. Eila dovdá stuora gudnin bargat singuin ja sis oahppat.

– Dihten dušše ahte dát lei dakkár fálaldat maid in sáhttán massit. Lea ain veahá imaš jurddašit ahte duođai ožžon dan barggu. Eallin rievdá hui fáhkka, lohká Eila, gii dakkaviđe celkkii eret buot eará bargofálaldagaid ja dollii Guovdageidnui ja Beaivvážii dás moadde vahkku áigi. 

Mánáidteáhteris álggii

Deanu kulturskuvlla mánáidteáhterjoavku lea su vuolggasadji. Das maŋŋel lea Álttá joatkkaskuvllas váldán drámáoahpu. Oktiibuot 13 jagi lea 18 jahkásaš leamaš teáhterbirrasis. Son lea leamaš Ronja Rievvárnieida ja Jeagge-Jussa. Muđui lea johtán viidát teáhtera oktavuođas. Lávddis son loaktá bures, muhto ii leat vel válljen masa čiekŋut:

 – Dieđán dušše ahte háliidan neaktit sámegillii. Dat lea dat alimus mihttomearri. In leat vuos mearridan makkár neavttároahpu háliidan váldit, háliidango leat realisttalaš neavttár vai fysalaš neavttár. Lihkus lea olles eallin geahččaladdat iešguđetge surggiid, dadjá nuorra nieida.

Álgá Norgga stuorimus lávddis

Geahččit besset oaidnit Eila ámmátteáhterlávddis golggotmánu 4. b. rájes, ja dat dáhpáhuvvá ovttas Norgga stuorimus teáhterlávddiin. Human Zoo lea ovttasbargobuvttadus Sámi Nationálateáhtera ja Nationaltheatret gaskkas, ja dan oktavuođas lea sihke Human Zoo -čájálmasas ja Eilas vuosttaščájálmas Nationálateáhteris. Dan maŋŋel johtá Eila ja čájálmas viidát sihke Norgga, Ruoŧa ja Suoma bealde. Čájálmasmátki loahpahuvvo Guovdageainnus skábmamánu gaskamutto. Nuorra neavttáris leat stuora vuordámušat.

– Mun vuorddán boagustit olu. Čierrut olu. Seahkanit veahá maid. Mun illudan čiekŋut neavttárvirgái álfárot, dovdat mo dat duođai lea. Ja, fanahit sihke dovdduid ja goruda dohko gosa rollat gáibidit,  loahpaha deatnulaš Eila Ballovara Varsi, duhtavaš ja nuorra hárjánan neavttár.

Čále cealkámuša

Your email address will not be published. Required fields are marked *