Diŋgo donge! 
Elin Oskal debutere sámi teáhterlávddis ja su jienas lea dehálaš sadji musikálas. Preassagovva
Musikála vuođđun lea dološ sámi muitalus gándda birra gii hárddii guovssahásaid, cuvccas maid Nils Gaup lea guoddán mánnávuođa rájes. Dál beassá viimmat cegget čájálmasa Sámi našunálateáhterii.
DEHÁLAŠ MUITALUS
Gaup čilge ahte buot muitalusat maid leat gullan bajásšattadettiin leat dehálaččat seailluhit ja muitaluvvot viidáset, ja justa dát cuvccas visualisere dan hui bures.
– Juohke háve go oainnán guovssahasaid, de muitán dán muitalusa. Mu mielas lea dat sihke dehálaš ja divrras ahte otná mánát ja nuorat besset oahpásmuvvat dološ sámi muitalusain, ovttas daid sámi diiddain ja govastagain, dadjá son.
DEBUTÁNTTA STUORRA JIENAIN
Čájálmasas leaikkastallo ja leat gelddolaš oasit, dasa lassin ollu ođđa fiinna musihkka, rámida teáhter. Mii beassat maiddái vásihit debutánttaid lávddis.
– Mii leat hui ilus ja duđavaččat go leat ožžon mielde nuorra sámi artistta Elin Oskala, gii lea dán jagáš sámi BlimE-artista. Son debutere neavttárin Sámi Našunálateáhteris dán musikála oktavuođas, celket teáhteris.
ÁVVUDEAMIT
Sihke Beaivvážis ja Nils Gaupas lea ávvujahki dál.
– Mun debuterejin teáhterbagadallin, čájálmasain «Gutten og gullfuglen» ja ledjen maiddái koreográfa Beaivváža vuosttaš čájálmasas «Våre vidder» jagi 1981. Mus lea maiddái Knut Walle mielde dramaturgan dán čájálmasas. Son lei dat vuosttaš dáiddalaš jođiheaddji teáhteris ja son bagadalai vuosttaš čájálmasa. Nu ahte muhtin láhkai sáhttá dadjat ahte mii leat joavdan dál gitta geahččái, loahpaha Gaup mojunjálmmiin.