Árvu jođiha boahtte Faamoe 

Designfitnodat Árvu galgá jođihit boahtte Faamoe-prográmma. Árvvu eaiggát guovttos leigga ieža mielde go prográmma vuosttaš geardde lágiduvvui. Dál galgaba iežaska vásáhusaid bokte ja gelbbolašvuođain bagadit earáid.  

ILLUDEABA: Árvu-fitnodaga eaiggádat leat guovdageaidnulaš govvejeaddji Marie Louise Somby, ja deatnulaš grafihkalaš hábmejeaddji, Karine Kimo Pedersen. Soai illudeaba jođihit boahtte Faamoe-prográmma Sámedikki ovddas. Preassagovva

Árvu-fitnodaga eaiggáduššaba govvideaddji Marie Louise Somby, Guovdageainnus eret, ja grafihkalaš hábmejeaddji Karine Kimo Pedersen,  Deanus eret. Goappašagat leigga mielde vuosttaš Faamoe prográmmas ja ovddit fitnodatovddidanprográmmain, maid Sámediggi lea lágidan.   

– Ledne čuvvon ollu prográmmaid dan rájes go leimme aiddo álggahan iežame fitnodaga. Ja de bođii Faamoe-prográmma seamma čavčča go ovttastahtiime fitnodagaid. Dat leamaš hui dakkár «eye opener» (čalbmerahppi), ledje ollu diŋggat maid birra ean lean geargan jurddašit. Moai dovddaime prográmma hui dehálažžan, go das lei ollu fokus rehketdollui ja dieđus mearkagálvui. Go bargá fitnodagain, de ii leat álo nu buorre áigi čohkkedit ja jurddašit daid birra ja prográmma geažil bággehallen bidjat dasa áiggi, čilge Marie Louise Somby SÁMi magasiidnii.

GOVVEJEADDJI: Marie Louise Somby lea oahppan govvejeaddji. Dá son lea bargamin dan masa liiko buot eanemus. Govva: Árvu

ČASKKIIGA OKTII

Dát guokte sámenissona oahpásmuvaiga Troanddimis, gos oktanis vácciiga design-skuvlla ja ásaheigga goappatge fitnodaga 2013:s, iešguđet guovlluin Finnmárkkus. 2018 mearrideigga časkit oktii fitnodagaid ja dakka maŋŋel lágiduvvui vuosttaš Faamoe-fitnodatdeaivvadeapmi, mii lei dehálaš veahkki fitnodaga ovddideapmái. Prográmma bisttii jagi.

– Moai oinniime ahte sáhtiime seastit olggosgoluin ja nannet nubbi nuppi. Oinniime oktasaš prošeavttaid olis ahte moai doaimmaime hui bures ovttas ja ahte munnos lei hui seamma jurddašanvuohki ja árvvut. Dat lei hui buorre go bođii dat prográmma justa go leimme časkán fitnodagaid oktii. Lávejetne vel odnege hállat dan birra ahte man riekta lei dahkat dan mearrádusa ja oidne ahte dat lei buot buoremus goappáge fitnodahkii, čilge Somby.

Somby muitala sudno nagodan dan rájes ovddidit oktasaš fitnodaga, lokten dietnasa ja ožžon eambo kundariid. Diibmá diiniga birrasiid 2,7 miljovnna kruvnno.

– Lea ollu álkit fállat kundariidda ollislaš bohtosa, go dušše ovtta buktaga, deattuha Somby.

SEAMMA JOAVKU:  Árvu ii lágit prográmma okto. Ovttasbargit leat áltálaš fitnodagat Kreativ Industri, rehketdoallofitnodat Accountor ja tromsalaš fitnodat, man namma lea «Være». Govva lea váldon Šoop Šoop -márkaniid oktavuođas diibmá. Gurut bealde Marie Louise Somby, Kirsten Østby (sámedikkis), Anna Lisa Johannesen (Være), Karine Kimo Pedersen (Árvu) ja Knut Arne Iversen (Kreativ Industri).

GIITEVAŠ

Árvu-fitnodat lea hui giitevaš ja vuollegaš ahte oaččui dán stuorra vejolašvuođa ja illuda jođihit boahtte Faamoe prográmma.

– Dat mearkkaša hui ollu ja lea hui stuorra gudni ahte Sámediggi oaidná munno ja munno ovttasbargoguimmiid gelbbolašvuođa ja atnet dan árvvus. Ii leat dušše Árvu mii lágida dán prográmma, dat lea ovttasbargu áltálaš fitnodagain Kreativ Industriain, rehketdoallofitnodagain Accountor ja tromssa fitnodagain man namma lea «Være», čilge Somby.

OVDAMUNNIN

Faamoe-prográmma ulbmil lea nannet sámi fitnodagaid gelbbolašvuođa, ekonomiija, haddema, gálvvu ja ollu eará. Lea ovdamunnin ja álki munnuide jođihit prográmma go letne ieža fitnodateaiggádat ja dihte ja dovde hástalusaid, maiguin berrešii bargat ja maid ferte garvit.

– Dan lea maiddái dehálaš oažžut mielde, ahte dán prográmmii sáhttet searvat buohkat, sihke álggahallit ja maiddái sii geain lea leamaš fitnodat guhká, deattuha Somby, gii muittuha ahte ohcanáigemearri prográmmii lea borgemánu 15. beaivvi.

BUORIT BOHTOSAT: Soai hábmeba earret eará logoid ja ráhkadeaba márkanfievrredeami fitnodagaide álkibun. Soai leaba earet eará leamaš govvemin Skodi Rein fitnodaga buktagiid.

ULBMILIN NANNET

Faamoe lea fápmu máttasámegillii ja fokusin lea nannet fitnodagaid mearkagálvvu ja servviid ekonomiijastivrema. Dehálaš ágga manne searvat Faamoe-prográmmii, lea iežas fitnodaga viiddideapmi, ja dasto beassat deaivvadit earáiguin, geat leat seamma dilis.  

– Eará fitnodateaiggádiiguin deaivvadeapmi lea hui dehálaš, erenoamážit singuin geat barget seamma suorggis. Olugat čohkkájit okto ja barget, danne lea dehálaš deaivvadit earáiguin seamma dilis. Dáin deaivvademiin ásahuvvo ovttasbargu ja ovddidit máhtu, mas lea hui stuorra árvu ovttaskas fitnodahkii, dadjá sámediggeráđi Silje Karine Muotka (NSR) preassadieđáhusastis.  

OAIDNÁ DEHÁLAŽŽAN: Sámediggeráđđi Silje Karine Muotka.
Preassagovva: Åse M.P. Pulk/Sámediggi

ČÁJEHIT BIRGEJUMI

Muotka dadjá ahte ulbmil vuosttaš Faamoe prográmmain, masa Árvu searvvai, lei hukset sámi fitnodagaid mat leat njunnošis iežaset suorggis ja mat lihkostuvvet. Son oaivvilda maiddái hui dehálažžan fokuseret fitnodagaid nannemii dálá eahpesihkkaris dilis.

– Mii dárbbašit lihkostuvvi sámi fitnodagaid, mat čájehit ahte lea vejolaš ásahit fitnodaga, mii birge. Sámedikki ovddasvástádus lea loktet dákkár beliid ovdan, danne illudahttá mu go sii galget jođihit Faamoe 2. Mii sávvat ahte dát bargu addá Árvui lassivejolašvuođaid ja ahte sii daiguin vásáhusaiguin maid sii leat ožžon, leat mielde loktemin eará sámi fitnodagaid, dadjá Muotka loahpas.  

–  Mii leat golbma bargi. Korona bissehii min doaimma maiddái. Dat bisánii oanehis botta, muhto ealáskii fas go lei oanehaš mannan. Dat dovdui goittot nu bures ahte šattaimet olbmuid bidjat bággolupmui. Dát bargu Sámedikki bealis mearkkaša hui ollu munno fitnodahkii, loahpaha giitevaš Marie Louise Somby.

Čále cealkámuša

Your email address will not be published. Required fields are marked *