– Áinnas joatkkán NBR jođiheaddjin

Ellinor Marita Jåma lea dieđihan iežas joatkit NBR jođiheaddjin jus fal válljejit su ođđasit. Jus oažžu ođđa luohttámuša de ii searvva sámediggeráđi lahttun nugo plánejuvvon.

– Ii leat eahpádus ge ahte boazodoallu dat lea mu váimmu láhka ja dalle lea NBR dat rievttes arena, lohká Ellinor Marita Jåma.

Jåma lea 2014 rájes jođihan Norgga Boazodolliid Riikkasearvvi. Son lea maiddái Åarjel-Samiej Gielh -listta sámediggeáirras. 2017 šiehtai Jåma NSR:in čohkkát ráđis guokte jagi. Jåma lea olles dálvvi jurddašallan maid galgá válljet.

– In leat vel cealkán eret ráđđesaji, muhto lean dieđihan sámediggepresidentii ahte lea dáhttu joatkit NBR jođiheaddjin. Ii mus leat makkárge garantiija ahte válljejuvvon ođđasit, muhto jus válljejuvvon de šaddá veadjemeahttun leat sihke NBR jođiheaddji ja sámediggeráđi lahttu, lohká Jåma gii lea Åarjel-Samiej Gielh áidna áirras.

– Ii leat oba eahpádus ge. Mu váibmu gullá boazodollui. NBR lea olu olahan, muhto ain leat stuora hástalusat ja mus lea ain hirbmat mokta ja energiija joatkit dáid bargguiguin ja buoremus sadji boazodoalu ovddas bargat lea NBR:s, lohká son.

Dássážii dušše son evttohassan

Leat stuora vejolašvuođat ahte Jåma válljejuvvo ođđasit NBR jođiheaddjin riikkastivrras geassemánu 14. – 16. beaivve. Dássážii ii leat oktage dieđihan gilvaleaddjin.

– Lean aivve buriid gullan báikkálašservviin dasgo dáhtun joatkit. Vuhtto ahte leat duhtavaččat bargguin, maid mun ja máilmmi buorre stivra leat dahkan. Mis leamaš hui buorre ovttasbargu stivrras ja báikkálašservviid jođiheddjiiguin. Mii leat geavahan olu áiggi ja resurssaid lihtuid hukset, ja mii leat bargan dan ovdii ahte oažžut oktavuođa Stuoradikki áirasiiguin, Ráđđehusain ja eará organisašuvnnaiguin. Dál lea boahtte stuora ja dehálaš bargu oččodit buot boazosámiid mielde min organisašuvdnii, muitala son.

Hásttuha nuoraid

Earet daid stuora politihkalaš áššiid nugo ruvkedoaimmaid, bieggamilluid, boraspirepolitihka ja ođđa láhkaárvalusa, man vuođul earet eará dáhttot digitálalaččat mearkugoahtit bohccuid, de dáhttu Jåma oččodit eambbo miellahtuid organisašuvdna bargui.

– Lea hui buorre oaidnit ahte nuorat áŋggirdit boazodoallopolitihkas ja hástalit sihke min stivrra ja servodaga. Dat addá munnje fámuid. Lea nu máilmmi dehálaš ahte NBR stuorru. Mis leat máŋga lávdegotti ja posišuvnna, maidda dárbbašit olbmuid.

– Ráđđehus lea roassun

Vai buohkat dieđášedje makkár oaidnu dus lea – maid oaivvildat ráđđehusa boazodoallopolitihka birra, leaš dal sáhka sisabahkkemiid dahje digitálamerkema birra?

– Ráđđehusa politihkka lea roassun boazosámiide. Lea njulgestaga váivi leat vihtanin dasa ahte ráđđehus geahččala dáruiduhttit boazodoalu. Dat mii suhttada mu eanemusat, lea go eai dáhto guldalit ealáhusa ja go leat nu ipmirmeahttumat ahte eai oainne makkár váikkuhusat sin daguin leat. In ipmir ovdamearkka dihte manne dáhttot bákkus digitálamearkumiin álgit, almmá diehtit manne ja movt dan čađahit. Go dakkár lágaid duvdet min ala vaikko juohke sajis rávvejit ahte eai galgga dahkat dan, dat čájeha ahte sis eai ane árvvus boazodoalu, lohká Ellinor Marita Jåma.

Čále cealkámuša

Your email address will not be published. Required fields are marked *