Áigot ásahit sámi mánáidforuma

Sámediggi áigu ásahit sámi mánáidforuma mas earret eará oadjebas digitála árgabeaivi lea oassin dan barggus.

Sámediggi lea searvan Mánáidáittardeaddji alladási čoahkkimii dán vahkus, mii lea Mánáidáittardeaddji álgga váikkuhan dihtii guhkes áiggi ja oktiiordnejuvvon áŋgiruššama dan ektui ahte oččošeimmet oadjebas digitála árgabeaivvi mánáide ja nuoraide.

Mánáidáittardeaddji háliida ahte áŋgiruššan galgá vuođđuduvvot mánáid vuoigatvuođaide mánáidkonvenšuvnna mielde ja oaidná man deahálaš lea ahte mánát ja nuorat leat mielde váikkuheamen dán barggus.

Sámediggi searvvai fárrolaga stuorradiggepresideanttain, stáhtaráđiiguin, stuorradiggepolitihkkariiguin ja mielde ledje maiddái badjel 30 eará almmolaš instánssa, organisašuvnna ja doaimma. Sii buohkat leat vuolláičállán oktasaš julggaštusa ja leat geatnegahttán iežaset čađahit unnimusat guokte doaibmabiju guhtege boahtte jagi.

Ášši joatká gova vuolde.

Sámediggeráđđi Mikkel Eskil Mikkelsen (NSR) vuolláičálii julggaštusa Sámedikki ovddas. Sámedikki preassagovva.

Okta doaibmabijuin maid Sámediggi lea geatnegahttojuvvon bargat lea sámi mánáidforuma ásaheapmi man oktavuođas earret eará oadjebas digitála árgabeaivi lea oassin sin barggus. Sámediggeráđđi Mikkel Eskil Mikkelsen (NSR) vuolláičálii julggaštusa Sámedikki ovddas.

– Dál ii leat mis Sámedikkis makkárge arena gos digáštallat ja ságastallat mánáiguin ja nuoraiguin. Mii fertet ságastallat singuin, eat ge sin birra, go bargat suorggis mas sis lea ollu eanet máhttu ja vásáhusat. Erenoamážit go bargat sin digitála árgabeaivvi ektui, mas rávisolbmuin ii leat buorre oaidnit mainna sii rahčet, dadjá Mikkelsen preassadieđáhusastis.

Ášši joatkašuvvá gova vuolde.

Sámedikki individuella julggáštus. Sámedikki preassagovva

DIGITÁLA GIVSSIDEAPMI FÁDDÁN

Sámediggi áigu maiddái lágidit konferánssa givssideami birra, muhto maiddái digitála givssideami birra, mii lea okta fáttáin. Konferánssas galgá leat bargobádji masa sámi mánát ja nuorat (mánáidforum) bovdejuvvojit searvat. Konferánssas lea fágalaš oassi rávis olbmuide geat barget mánáiguin ja eará áigeguovdilis aktevrraide.

– Sámediggái lea deahálaš bargat dan ovdii ahte buot mánát ja nuorat vásihit oadjebasvuođa ja gullevašvuođa buot arenaide gos sii leat, leš dal fysalaš dahje digitála. Mii diehtit ahte sámi mánát ja nuorat dávjá vásihit vaššicealkámušaid, vaši ja vealaheami Norggas, árgabeaivvi mii ii leat oadjebas. Mii diehtit ollu dán birra, ja mun áinnas háliidan bargat sámi mánáidforuma ásahemiin riikarájáid rastá oktan doaibmabidjun, dadjá Mikkelsen.

Ášši joatkašuvvá gova vuolde.

Mikkel Eskil Mikkelsen ja Mánáidáittardeaddji Inga Bejer Engh. Sámedikki preassagovva

Sártnistis son ovdanbuvttii sitáhtaid digitála mediain main ledje rasisttalaš cealkámušat sámiid birra. Dat eai lean boarráset go guokte váhku boares sitáhtat, mat ledje vižžojuvvon sosiála mediain, dan oktavuođas go Girjáš sámečearru Ruoŧa bealde oaččui vuoigatvuođa hálddašit smávvafuođđobivddu ja guolástusa, ja man oktavuođas čájehuvvui vašši sámiid vuostá sosiála mediain ja main ledje ávžžuhusat goddit sámiid.

– Maŋimuš áiggis leat mii dađi bahábut oaidnán ollu rasisttalaš cealkámušaid ja leat oaidnán ahte vuortnuheaddji cealkámušat sámiid vuostá leat lassánan mediain ja erenoamážit neahttaságastallamat ja mat leat suorggahahtti ollu. Ja lea iešalddis čielga ášši ahte mii searvat dán deaŧalaš bargui, dadjá Mikkelsen.

Leave a Reply

Your email address will not be published. Required fields are marked *