80% sihkar ahte KEiiNO vuoitá Eurovision Song contesta

Fred René Buljo áhčči Klemet Anders Buljo lea Tel Avivas. Son lea nu gealdagasas ovdalaš semifinála ja jáhkká KEiiNO joavdá finalai ja vuoitá vel olles Eurovision Song contest gilvvu.

JEARAHALLAN: GLR, NILS MARTIN KRISTENSEN – HEIVEHAN JA ČÁLLÁN: MÁRGGET JON BIRET ÁMMUNA ÁNNE BIRET, ÁNNE BIRET ANTI

– Lean 80 proseantta sihkar ahte Fred René ja KEiiNO vuitet Eurovision Song contesta. Jus lea oktage gii sin časká, de dat ferte leat Italia. Állet fal sin gal jienas, reašká áhčči Klemet Anders Buljo telefovnna geahčen.

Čehpet promoteren iežaset

Son lea Tel Avivii vuolgán doarjut bártnis ja su joavkku KEiiNO. Áhččeolmmoš illuda vásihit ESC ja iežas bártni lávdde alde. Vaikko joavku ii leat dat buoremus oddsa betting-listtain, de son jáhkká mannat hui bures KEiiNOin. KEiiNOs leamaš oainnát čeahppi promoteret iežaset ja lávlla «Spirit in the Sky» lea máŋga váimmu juo suddadan.

Fred René Buljo illá oba jáhkii ge ahte vuite Norgga Grand Prix. Dál son lea luođi juo doalvume miehtá Eurohpa. Govva: EBU

– Rybak lei maid sullii seamma dásis oddsas logi jagi áigi. Ii son ge lean bajimusas, muhto lihkká son vuittii, ja nu lea Keiinos ge buorre doaivva. Duorastaga lea semifinála, ja mus lea buorre doaivva ahte Keiino joavdá gitta finálii mii lea lávvardaga, lohká son.

Olu gávttehasat Tel Avivas

Maŋŋebárgga eahkeda dat Klemet Anders seaivvui Tel Aivii Israelii. Gaskavahku eahkeda beasai son deaivvadit joavkkuin, vaikko sis lea spágga dievva prográmma. Tel Avivii leat máŋga eará sápmelačča ge mannan, earet eará Fred oabbá ja Ole Máhtte Gaup geainna čuojaha ovttas Duolva Duoddaris. Maiddá Ávvir ja Ságat leat sajis. Vaikko Tel Avivias lea 30 lieggagráda de lohpida Klemet Anders ahte gávttehassan sii vulget sihke semifinálii ja finálii.

Fred René áhčči Klemet Anders Buljo lea Tel Avivas čuovvume iežas bártni. Son hirbmadit čevllohallá ja lea dadjat juo áibbas  sihkar ahte vuitet olles Eurovision Song contest gilvvuid. Priváhta govva.

– Gal duon oanehis botta ferte gierddahallat báhkkasis. Ledjen duo moadde jagi ági Cubas ja doppe lei 40 lieggagráda. Beaivvi ja eahketbotta ledjen gávttiin čiŋadan, nu ahte ii go son mana bures dáppe ge, lohká son.

Alla sihkkarvuohta konfliktabáikkis

Klemet Anders lea bargan moanat jagiid Guovdageainnu beassášfestiválain, ja dovdá musihkkalágidemiid bures. Son lohká stuorámus erohus lea Norgga Grand Prixas ja doaluin Tel Avivas lea sihkkarvuohta.

– Spectrumas ledje 10 000 olbmo, dáppe šaddet 5000 olbmo. Stuorámus erohus lea sihkkarvuohta go dá lea konfliktariikka. Girdihámmanis hirbmadit dárkkistedje. Máŋgii dárkkistedje ja dutkkahedje. Dan in leat vásihan eará sajiin, lohká son.

Boikohtta akšuvnnat

Ahte ESC lágiduvvo justa dáppe, leage suhttadahttán máŋgasa. Sii ávžžuhit olbmuid boikohttet sáddaga eaige ipmir manne KEiiNO oba searvá ge dáid gilvvuide go juo leat Israelis. Dáid boikohttemiid ii ipmir Klemet Anders, go ii han leat Keiino sivva ahte gilvvut leat Israelas.

– Norggas leat buori diplomáhtalaš oktavuođat Israelin, ja seammás leat dohkkehan Israel ja palestiinnálaččaid. Norga lea hui čeahppi leamaš dán áššis. Juohke áššis han leat guokte beali ja dan máŋggas vajálduhttet. Dát ”soffá-boikohtterat” eai dieđe buohkat man birra sii hupmet ge. Sii čállet sosiálamediain ahte boikohttejit, muhto eai čále dan duogáža dasa. Jus KEiiNO ii lean vuolgit dohko, de ii livččii dat mearkkašan maidege eaige lean buoret leamaš go soffá-boikohtterat. Go vulge deike, servet gilvvuide, de ferten lohkat nugo ieža ge lohket, ahte sis lea de vejolašvuohta čájehit ahte dáhttut ráfi. Jus vuitet vel de sis lea olu eambbo dadjamuš. ESC leat doalut gos čanat oktavuođaid riikkaidgaskasaččat. Doalut eai váldde beali riidduin. Dat ii leat politihkalaš.

– Klemet Anders, lihkká lea gal hui duođalaš dilli dien guovllus, ja Gaza ja Vestbredden gos lea oba olu konflikta dál, han ii leat guhkkin eret Tel Avivas. Maid don jurddašat das?

– Juo. In mun meidne bagatelliseret dáid konfliktaid ja dan dili obanassiige, muhto čohkkát ruovttus, boikohttet iige dahkat maidege dan ášši ektui, dasa mun in liiku, lohká son.

Duorastaga lea semifinála. Jus KEiiNO joavdá finálii, de leat lávdde alde lávvardaga Tel Avivas Eurovision Song contest gilvvus. 

Ovttasbargodoaimmahus GLR ii fidnen ságaide Fred René Buljo, muhto mii sávvat lihkku gilvvuide.Emneord: MagasiidnaOđđasatKultuvra

Čále cealkámuša

Your email address will not be published. Required fields are marked *