Nationálaárdna Nordkáhppa 2020

Jahkásaččat čágašedje Nordkáhppii 300 000 galledeaddji, nuba sáhtášedje mealgat eanet turisttat fitnat ovdalgo Nordkáhppašleađđu dievvagoađášii. Dábálaččat báikkis fitnet 20 000 norgalačča, muhto dán jagi vurdet 200 000, čájeha varas iskkadeapmi maid Norsk Friluftsliv lea čađahan.

Dábálaččat báikkis fitnet 20 000 norgalačča, muhto dán jagi vurdet 200 000, čájeha varas iskkadeapmi maid Norsk Friluftsliv lea čađahan. Buot govat: Tove Andersson

Máhkarávjjus, 307 mehtera bajábeale ábi, fitnet birrasii 300 000 turistta juohke jagi, dovdamin garra dálkki ja biekka, diehtemeahttumat riiddu birra báikkis. Oktiibuot leat golbma monopola 90 jagi jođihan stealli, mii maiddái rievdadii politihkalaš gova Nordkáhppa gielddas 2019 go Bargiidbellodat massii eanetlogu 27 jagi maŋŋá. Dál lea Nordkáhppašleađu ođđa láigošiehtadus vuolláičállon, muhto lihkká leaba Nordkáhppa gielddastivra ja Scandic ain guhkkin eret nubbi nuppis doaibmalohpeáššis.

– Doaibmalohpi ii gula mange láhkai Nordkáhpa fitnodatjođiheapmái. Ii leat doarvái čielga erohus das mii gullá iešgoasttádussii ja mii Scandica fitnodatdoibmii. Danin fertii doaibmalohpeohcamuš biehttaluvvot, lea Nordkáhpa sátnejođiheaddji Jan Olsen (SV) lohkan árat Radio Nordkappii.

Nordkáhppa – ikona

Kristen Albert Ellingsen, UiT Institutt for reiseliva doseanta, jáhkká ahte Nordkáhppii bohtet guossit dánge jagi, muhto eai soaitte boahtit nu ollugat, go lávejit.

– Nordkáhppa lea ikona báikkiid gaskkas, mat geasuhit olbmuid Finnmárkui ja olles Norgii. Sii geat vulget dohko, čalmmustahttet dan sosiála mediain ja gaskkustit positiivvalaš áššiid Nordkáhpa birra. Dan geažil stuorru Nordkáhppašleađu Norgga márkan ovddos guvlui, lea Ellingsen lohkan NRK:i.

Dat doallá deaivása analysa ektui, maid Norsk Friluftsliv lea čađahan Ipsosanalysafitnodaga bokte, oaidnin dihte gosa norgga turisttat háliidit mátkkoštit dán jagi. Jus iskkadeapmi doallá deaivása, sáhttet Nordkáhppii boahtit birrasiid 200 000 norgga turistta geasset, čálláges Ságatáviisa. Liikká livččii ain sadji measta 100 000 galledeaddjái.

Turismma álgu

Go Nordkáhpa geaidnu rahppui jagi 1956, attii dat vuođu 40 000 jahkásaš galledeaddjái jagis 1966. Ovdal ledje fatnasiiguin boahtán gáddái Hoartnas (Hornvikas) ja gorgŋon ceakko tráhpá bajás šleđđui. 1927 ásahuvvui Honnesvágis vuosttaš riikkaviidosaš mátkeealáhussearvi, man namman šattai Nordkaps Vel, ja masa juolluduvvui vuosttaš oktovuoigatvuohta doaimmahit Nordkáhpa 1928 rájes.

Nordkáhpas turisttat hirpmástuvvet erenomáš fiinna birrasa geažil, muhto guovssahasaid vuolde leamaš maiddái riidu. Gielddas, mas leat 3291 ássi, háliidit boahtte buolvvaide buriid eallineavttuid ja ceavzilis turismma. Riiddu vuođđun lea leamaš bileahttadienas, maid gallededdjiid leat máksán vai besset šleđđui, ja mii rihkku olgoáibmolága. Seammás lea Nordkáhpa servodat ožžon menddo unnán ruovttoluotta nationálaártnas.

Ovdal láigu lei 70 000 kruvnno jagis, ja go turisttat mákse stuorra hatti bileahtas vai besse šleđđui, de lei doaimmas sullii 70 miljovnna kruvnno dienas, mii lei Scandic-Ricai (Rica Eiendom) ereliiggán buorre šiehtadus, dassá go láigošiehtadus šiehtadallui ođđasit FeFo:in (Finnmárkkuopmodagain), mii lea eanaeaiggát. Jagi 2019 ráhkaduvvui ođđa láigošiehtadus fápmui, man sihke FeFo ja Rica Eiendom stivrrat leat dohkkehan. Ođđa šiehtadusa vuođul jahkemáksun šattai 3,48 miljovnna kruvnno. Ođđa láigošiehtadusas lea areála gáržžiduvvon sakka, seammás go Rica Eiendom áigu ásahit báikkálaš foandda, mii galgá addit buriid váikkuhusaid Honnesváhkái ja Nordkáhpa gildii.

Jagi 2020 leat sirren biilaguođáhatmávssu ja sisabeassanmávssu. Nugo ovdal, de besset nuvttá sisa sii geat bohtet vácci dahje sihkkeliin ceakko milliid bajás Nordkáhppii. Ja jus áiggut leat olgun – itge geavat Nordkáhppahálla fálaldagaid – de it dárbbaš máksit.

– Lea nuvttá jus orru olgun, dadjá Håkon Knudsen, gii lea Scandic Nordkapp gulahallanolmmoš. Dan čállá Radio Nordkapp.

Máŋgasat navdet ahte leat fitnan Eurohpá davimus geažis go máhccet ruovttoluotta Nordkáhppašleađus, muhto nu ii leat.

Kniskárnjárga (Knivskjellodden) lea 1 611 mehtera davvelis ja doppe lea giilaguođáhat daidda, geat háliidit vázzit beaivemohki dohko. Knivskjelloddenii ii mana geaidnu, dušše oktageardánis, gávcci kilomehtera guhkes bálggis. Dat lea fiinnis, merkejuvvon máđija, ja doppe sáhttá oaidnit šleađu goalkin.

Dá mun lean Nordkáhpas, olggumusas Finnmárkkus, ja mun sáhtán roahkka lohkat olggumusas olles máilmmis, dan sivas go ii gávdno báiki davvelis gos olbmot leat orron. Mu sáhkkiivuohta lea dál duhtaduvvon, ja mun sáhtán máhccat ruovttoluotta Dánmárkui, ja jus Ipmil háliida nu, de iežan ruovtturiikii (Francesco Negri, 1664).

Fáktadieđut:

Honnesváhki lea Máhkarávjjus. Nordkáhpa gielda lea Eurohpá davimus gielda.

http://www.nordkapp.kommune.no/om-nordkapp.2941.no.html

Čále cealkámuša

Your email address will not be published. Required fields are marked *