Outi Pieskii 35 000 euro bálkkašupmi

Govvadáiddár Outi Pieski lea ožžon juolluduvvot 35 000 euro sturrosaš bálkkašumi Suoma Kulturruhtarájus.

Govvadáiddár Outi Pieski lea dovddus sihke iežas váikkuheaddji installašuvnnain, njuohtamiin ja fotogovain, maid fáttát laktásit davviguovlluid lundui ja sámi kultuvrii.

Pieski lea bajásšaddan Helssegis ja lea váldán oahpu Govvadáiddaakademiijas (Kuvataideakatemia). Son lea maid studeren sámi duoji Sámi oahpahusguovddážis, Anáris. Dán áiggi son orru ja bargá sihke Mátta-Suomas ja Sámis, áhči beale soga ruovttuguovllus, Ohcejoga Dálvadasas.

ILUS JA RÁMIS

Pieski lea hušaid siste go SÁMi magasiidna riŋgesta sutnje. Son lea iežas jumeš guovttoin bargamin ođđa prošeavttain, muhto astá lihkká kommenteret oanehaččat illusága.

– Mun lean dieđusge hui ilus ja rámis dán ovddas. Dat lea stuorra gudni ja lea hui stuorra ášši fuomášit ahte váldokultuvrra olbmot atnet árvvus sámi eatnanvuoigatvuođaáššiid ovddideami. Dat lea midjiide buot eamiálbmogiidda stuorra ášši, illuda Pieski.

Pieski bargá aktiivvalaččat sámi kultuvrra bealis ja lea maid gieđa dáidduid meašttir. Pieski bargguin luondu, kultuvra ja dáidda sihke čatnasit báikái ja leat seammás maiddái universálat. Son oaččui 2017 Suoma dáiddaakatemiija bálkkašumi ja lei dáiddadujiidisguin mielde ollašuhttimin Suoma paviljoŋŋa Venezia biennálas 2019.

– Mun oainnán ahte go oaččun dákkár bálkkašumi, ahte sii oidnet árvvu barggus, mii dávjá láktasa justa dáid sámi áššiide.  

Bálkkašupmi addojuvvo áiggehis áiggi čuolmmaid čuolmmadeaddjái, davvi luonddu ja olbmo bealušteaddjái sánehis historjjá eallin dahkamis. 

– Doarjaga áiggun geavahit iežan dáidaga ovddideapmái ja buvttadeapmái. Mii leat dál govvemin video-installašuvnna, mii boahtá fiinna čájáhussii. Mun lean bargamin ovttas iežan nieidda guoktáin, Katja ja Biret Haarlain. Mii leat justa dál govvemin dáppe govvenstudios, muitala son. 

DUOGÁŠ

Sámi duojit leat Pieski mielas árbedieđu mihtitmeahttun dehálaš gáldu. Pieski lea ovttastan sámi duoji dološ ivnniid, hámiid ja vugiid dálá dáidaga árbevieruide. Su málagovain čuovgá davvi čuovga ja daid duogážis leat áigeguovdilis temát. Pieski dáidaga guovddášfáttat leat sámiid historjá ja boahtteáigi, eamiálbmogiid vuoigatvuođat, oktavuohta lundui, dásseárvu ja bistevaš ovdáneapmi.

Lux Helsinki – čuovgadáiddadáhpáhusas 2017 Helssega duopmogirku lásain golggai čuovgadáidda čáhcerávdnjin. Dat čalmmustahtii čázi geavaheami ja luonddu suodjaleami gažaldagaid.

Suoma Kulturruhtarádju dahje Kulturfoanda lea priváhta ruhtarádju, mii juohká veahkkeruđaid sierra kultursurggiide guovddášruhtarájus ja 17 eanagodderuhtarájus. Foanddas leat maid iežas kulturdoaimmat.

Čále cealkámuša

Your email address will not be published. Required fields are marked *