Gáranasvuona bivnnuhis duojit

Smávva buvda Gáranasvuonas lea šaddan bivnnut sámi dujiin, maid Eva Isaksen duddjo. Buot govat: Jan Skoglund Paltto

Eva Isaksen lea bajásšaddan Gáranasvuonas, Tromssa suohkanis. Su fitnodaga namma, RavenWings, boahtá su ruovttubáikki namas, Gáranasvuonas. Soaját galget loktet su bajás ja ovddos. Son buvttada iešguđet lágan náhkkedujiid.

DUDDJO OLLU

Isaksen vuovdá eanaš dujiidis meassuin ja márkaniin. Sus maiddái diŋgojit dujiid.

– Mun goarun veaskkuid ja káffepusiid fabrihkkanáhkis ja sisttis. Mun ráhkadan náhkkegiehtabáttiid, main lea datni ja čoarvi, dahje dákti. Goarun luhkaid ja veahá gávttiid. Goarun náhkkegahpiriid ja fáhcaid sihke njurjonáhkis, duoljis ja riebannáhkis. Goarun maiddái gihcenáhkkegahpiriid ja fáhcaid. Ja de ráhkadan bađavuložiid duoljis. Ráhkadan iešguđetlágan boahkániid. Mu gánddat leaba goappašagat badjealbmát, nu ahte mus lea álki oažžut ávdnasiid, čilge son.

Ášši joatkašuvvá gova vuolde.

GIEHTABÁTTIT: Son ráhkada iešguđetlágan náhkis ja sisttis giehtabáttiid, maid herve daniin, dávttiin dahje čorvviin.

MÁKSET ÁINNAS EAMBO

Bivnnuheamos buvtta sus justa dál lea riebannáhkkegahpir ja lohká olbmuid háliidit gieđain gorrojuvvon kvaliteahttagahpiriid, ovdalii fabrihkas buvttaduvvon gahpiriid.

–  Mun vuovddán daid ollu. Olbmot mákset áinnas veahá eambo jus ožžot gieđain gorrojuvvon gahpiriid.

Ášši joatkašuvvá gova vuolde.

VUOVDÁ OLLU: Gáranasvuona nisu vuovdá eanemus riebannáhkkegahpiriid.

SÁMI MÁTTUT

Son bargá beallevirggis oahpaheaddjin ja astoáiggis duddjo. Son lea oahpahallan maiddái sámegiela, muhto ii šatta dan geavahit doarvái dávjá.

– Mus leat sámi máttut. Mu máttaráddjá, Henrik Omma, lei eret Ruoŧa beale Sámis. Sis lei boazosiida dáppe Tromssas ovdal, muhto eai ožžon joatkit doaluin. Son goittot sajáiduvai deike siskkimužžii, Gáranasvutnii, ja dáiddii leat okta vuosttažiin geat dahke dan, čilge son.

Ášši joatkašuvvá vuolde.

Eva Isaksen bargá beallevirggis oahpaheaddjin ja astoáiggis duddjo. Son lea oahpahallan maiddái sámegiela, muhto ii šatta dan geavahit doarvái dávjá.

OAHPPAN NUORRAN

Son lea liikon giehtaduodjái olles eallima, muhto beroštupmi sámi duodjái badjánii easkka iežas ovddeš vuonáhkku rohki luhtte, gii su oahpahii duddjot. Go mánát sturro, son astagođii duddjot eambo.

– Mun ledjen badjelaš 18 jahkásaš ja son oahpahii munnje duddjoma vuođu ja mo galggai náhki goarrut. Lean maiddái ollu ieš oahppan ja vázzán muhtin kurssaid.

Ášši joatkašuvvá gova vuolde.

DUDDJO OLLU: Eva Isaksen duddjo ollu. 

BUORIT VÁSÁHUSAT

Nu mo ollu eará duojárat, son maid oasálasttii Tromssa Sámi vahkku Šoop Šoop Sámi Design Days 2020 -márkaniidda. Son dattetge oassálasttii dušše ovtta beaivvi, gaskavahkku. Sus leat dušše buorit vásáhusat márkaniin, ja sávvá dakkár márkaniid lágiduvvot dávjjit Tromssas.

– Mun jođihin muhtin veardde gálvvu. Geahččalin maid dahkat veahá observašuvnnaid gallededdjiid ektui. Ledje ollu turisttat, geat bohte Hurtigruta-fatnasa mielde. Ja hui ollu Tromssa sápmelaččat guovlladedje márkaniiguin. Muhto tromsalaččaid, geain ii leat sámi duogáš, gal in vuohttán doppe. Ferten goittot rámidit ahte lágideaddjit ledje márkaniid ráhkadan ja čađahedje hui ámmátlaččat.

Ášši joatkašuvvá gova vuolde.

GOARRU LUHKAID: Son goarru maiddái luhkaid ja veahá gávttiid.

Goas don šaddet gründárin/fitnodateaiggádin ja manin?

– Mun lean duddjon badjel beali iežan eallimis. Eaŋkilolbmofitnodaga álggahin goittot easkka birrasiid jagi áigi, go duddjon lei sturron astoáiggedoaimmas veahá viiddit doaibman.

Mii lea du stuorámus niehku ja leatgo čuovvulan dan?

– Mun lean olmmoš, gii liiko ovdánit várrugasat, lávkkis lávkái. Mun liikon oadjebasvuođas ja liikon ahte dieđán maid barggan. Nu ahte mu niehku gal livčče ožžodit smávva buvdda áiggi mielde deike ruoktot.

Mii lea leamaš stuorámus hástalus das rájes go álget?

– Dat leat buot hálddahuslaš barggut, mii sisdoallá lassiárvodivada ja vearuid ja iešguđet lágan gáibádusaid. Mu mielas lei hui váttis áddet lassiárvodivatgáibádusaid ja raporteremiid. Fitnen ovtta kurssas, mii galggai veahkkin. Mus ledje eambo gažaldagat go vástádusat maŋŋel dan.

Ášši joatkašuvvá gova vuolde.

DATNEBÁTTIT: Dá Eva Isaksen čájeha giehtabáttiid, maid lea ráhkadan náhkis ja danis

Leatgo ožžon makkárge veahki dahje doarjaga?

– Mun ožžon Sámedikkis 83.000 kruvnnu álggahandoarjaga. Dat lea oaivvilduvvon earet eará rusttegiid háhkamii, ja lei áibbas dárbbašlaš. Bessen oastit albma buorre goarrunmašiinna ja veahá eará rusttegiid. Lean hui giitevaš dainna.

Birgetgo iežat fitnodagain?

– Mun lean ain astoáiggedoaimma dásis.

Mo rávvešit eará álggaheaddji fitnodatolbmuid?

– Jáhkkán ahte olmmoš ferte leat veahá várrogas ja váldit smávva lávkkiid. Ráhkat maiddái čielga plána, maid áiggut bargat.

Gos oainnat iežat 5 jagi geažes?

– Sávvamis lean hutkan ja ovdánahttán eambo iežan buktagiid. Sávvamis lean ovdánan oba unna lávkkážage viidáset ja ožžon unna visttáža, gos beasan duddjot ja buvttadit iešguđetlágan dujiid. Gahpirat, goikkehat ja gálssohat gáibidit buori bargosaji ja dat ii leat mus dál.

Čále cealkámuša

Your email address will not be published. Required fields are marked *