31/05/2021

Elle-Máijá Tailfeathers vuittii Hot Docs bálkkašumi buoremus badjáneaddji filbmadahkkin

Sámi ja kainai filbmadahkki Elle-Máijá Tailfeathers vuittii bálkkašumi Davvi-Amerihká stuorámus dokumentárafilbmafestiválas Hot Docs.

LIHKOSTUVVAN SÁMI FILBMADAHKKI: Sámi ja kainai filbmadahkki Elle-Máijá Tailfeathers vuittii gieskat bálkkašumi Davvi-Amerihká stuorámus filbmafestiválas, Hot Docs, Kanádas ođđa guhkesdokumentárainis «Kímmapiiyipitssini: The Meaning of Empathy». Das lea mielde earret eará filbmadahkki doavttireadni Esther Tailfeathers (govas). Govva: Damien Eagle Bear.

Son vuittii Emerging Canadian Filmmaker-bálkkašumi filmmainis «Kímmapiiyipitssini: The Meaning of Empathy».

 – Tailfeathears lea guhkesfilmmainis ja guvttiin guhkesdokumentárainis badjáneaddji filbmadahkki, lohká árvvoštallangotti cealkámušas Variety bláđi mielde. 

GOVVIDA DÁLKKASDÁVDDA   

Su dokumentára čalmmusta opioidakriissa, masa Davvi-Amerihká lea fáhtehallan, ja mo dat lea čuohcan su eatni olbmuide, kainai álbmogii, maŋŋilgo fentanyla lea leavvan miehtá Blackfoot-reserváhta jagi 2014 rájes. Dat lea dagahan lohkameahttun badjelmeari stuorra dosaid geavahemiid, ja dearvvasvuohtabargit, nugo filbmadahkki iežas eadni Esther Tailfeathers, leat šaddan olbmuid veahkehallat geat leat «epidemiija gasku».

 

EATNI ÁLBMOGA HEAHTI: Elle-Máijá Tailfeathers’ ođđa guhkesdokumentára muitala, mo opioidakriisa lea čuohcan su eatni álbmogii, Kainai Nation, ja mo báikkálaš dearvvasvuohtabargit leat hutkan iežaset vugiid dikšut olbmuid – empatiijain ja fuolahemiin. Govva: NTB kultuvra

Elle-Máijá Tailfeathers gidde fuopmášumi sihke olbmuide, geat leat darvánan opioidaide, ja dearvvasvuohtabargiide, geat leat geavahišgoahtán ođđa vugiid eastadallat lassáneaddji dálkkassorjavašvuođa. Nugo filmma namahus muitala, de lea empatiija ja fuolaheapmi guovddážis.  

VÁSTTOSTA TRAUMAPORNO 

– Dallego ráhkadišgohten filmma, de ledje nu eatnat muitalusat ođasmediain mu servodagas. Máŋga ođasmuitalusa gehčče mu servodaga traumapornoperspektiivvas, ja muitaledje morrašis ja bákčasis, muhto velte muitaleames maid báikegottit barge váttisvuođaiguin, dadjá son Point of View Magazine bláđđái. 

OAHPAHII ETIHKA FILBMAJOVKOSIS  

Tailfeathers háliidii ieš čájehit, man mohkkái muitalus lea go dat mii muitaluvvo filmmain, ja laktá dán dearvvasvuohtaheađi koloniseremii. Son dadjá bláđđái, ahte filmma ráhkadeapmi leai «dego meašttiroahppu etihkalaš barggus du iežas servodagas». Dasa lassin oahpahii filbmadahkki iežas uhca filbmajovkkoža, mas eatnašat eai gullan eamiálbmogii, kultuvrralaš gealbbus ovdalgo filbmegohte, ja čájehii filmma olbmuide, geat govviduvvojit, ovdalgo loahpalaččat čuohpai dan.