Beakkán Vild-Hasse ballá pandemiija nohkadit Ruoŧa buoremus márkaniid

Vild-Hasse lea oahpis juohkažžii, gii lea fitnan Johkamohki márkaniin. Sus lea bolfe náhkkegahpir oaivvis ja guokte gumppenáhki čeabáha birra, ja son lávlu ja čuorvu hoahkamiid gávpediskka duohken. Beakkán boalvvir lea 1969 rájes gávppašan Johkamohkis, muhto dán jagi lei vuosttas geardi go ii beassan márkaniidda. Dál son ballá pandemiija duššadit márkaniid.