Tjaktjen Tjåanghkoe stuorru ja stuorru

Čakčamánus lea Tjaktjen Tjåanghkoe – máttasámi čakčafestivála. Doppe fállet dehálaš fágaseminára, nuoraidkonferánssa ja min iežamet nástti, Ella Marie Hætta Isaksena, konseartta.

– Várre fal čakčamánu 19. – 22. beaivvi ja boađe Snoasai, ávžžuha Saemien Sijte preassaovddasteaddji Susanne Lyngmann. 

Festivála lágiduvvo jo guđát geardde Snoasas. Tjaktjen Tjåanghkoe -festiválas deattuhit máttasámegiela ja kultuvrra. Dán jagi seminára fáddá lea «Gïele lea faamoe – Power of language». Maiddái Duohtavuođakommišuvdna boahtá muitalit barggus.

– Ieš konferánsa lágiduvvo Snoasa hoteallas. Earet eará Henrik Barrok boahtá muitalit movt giela válddii ruovttoluotta. Soabadanoassi Duohtavuohtakommišuvnnain sáhttá šaddat lossat ja čuohcat dovdduide ge, lohká Lyngman.

Tjaktjen Tjåanghkoe lea maiddái nuoraid várás. 

– Mis lea sierra nuoraidkonferánsa ja bargobájit. Min galledit maorit, geat bohtet Aotearoas (Ođđa Selánddas). Sii lágidit dánsun-, dáidda- ja gođđinbargobájiid. Mii maid ráhkadit bargguin čájáhusa. Dáiddalašvuođas han lea olu giella ja soabadeapmi, ja dat heive hui bures konferánsii. Obanassiige dáhpáhuvvá olu konferánssa oktavuođas. Mis leat duodjemárkanat, čájáhusat, njoarostangilvvut ja girjebusse ge, čilge Lyngmann.

Festivála stuorru ja stuorru, ja erenoamážit konsertii vurdet olu olbmuid. Lávddi alde lea Sámi iežas stuora násti Ella Marie Hætta Isaksen ISÁK-joavkkuinis. Son beaggigođii duođas go vuittii NRK «Stjernekamp»-gilvvu.

– Mis lea eanemus deaddu fágalágidemiide, muhto duođaid gal illudit dán konsertii, ja mii vuordit olu olbmuid dohko, lohká Lyngmann. 

Jus áiggut searvat konferánsii, de gávnnat dieđuid earret eará idjadeami birra festivála neahttasiidduin: 

www.tjaktjen-tjaanghkoe.no

Seedth mijjese dïejvesem

Your email address will not be published. Required fields are marked *