Kultuvre- jïh gaarsjelimmiestipeende 2019

Saemiedigkieraerie lea aktem kultuvrestipeendem jïh golme gaarsjelimmiestipeendh joekedamme 2019. Daanhtsoetjiehpiedæjja Ánna-Katri Helander kultuvrestipeendem åådtje, jïh treavkavuetjije Amalie Kristine Triumf, turnere Peder Funderud Skogvang jïh jïengehockeyspïelere Tuva Sirin Schall Mikkelsen gaarsjelimmiestipeendh åadtjoeh.

Saemiedigkien kultuvre- jïh gaarsjelimmiestipeende edtja saemien noerh skreejrehtidh eadtjaldovvedh tjeahpoen, kultuvren jïh gaarsjelimmien sisnjeli. Njieljie stipeendh, fïereguhte 25 000 kråvnah leah vadtasovveme.

– Mijjieh veeljeme jïh joekedamme stipeendem njieljie noeride mah hijvenlaakan vuesiehtieh mejnie saemien noerh gïehtelieh tjeahpoen jïh gaarsjelimmien sisnjeli, jïh gusnie gaajhkesh leah hijven illedahkh åådtjeme jïh syjhtedassh utnieh enn væjkalåbpoe sjïdtedh sijjen sjangerinie. Mijjieh dejtie læhkoehtibie  jïh gegkiestibie stipeende dejtie viehkehte guhkiebasse jåerhkedh, saemiedigkieraerie Henrik Olsen jeahta.

11 ohtsemh sïjse böötin, jïh gaajhkh lin krïevenassi mietie. Uktsie ohtsemh lin gaarsjelimmiestipeenden bïjre jïh göökte ohtsemh lin kultuvrestipeenden bïjre.

Daesnie buerkiestimmieh joekedimmide:

Kultuvrestipeende:

Ánna-Katri Helander, Kautokeino, lea joekoen væjkele daanhtsoje mij biehkieh sov kultuvreste daaletje tïjjen tjeahpoehammoejgujmie pleentie. Altese stijle jïh vuekie leah jorkesamme jaepiej tjïrrh, jïh sov tjeahpoen tjïrrh vuesiehtamme satne lea tjiehpiedæjja stoerre taleentine. Hiphopen tjïrrh aaj sïllem vaalta siebriedahkedigkiedimmien sïjse. Ánna-Katri lea daan jaepien noere tjiehpiedæjja orreme Riddu Riđđu Festivaalesne 2017, jïh ruffien 2018 sov kreatijve vïesehtimmiem eelki Lásságámmisne. 

Gaarsjelimmiestipeende:

Amalie Kristine Triumf, Storslett, sov gaarsjelimmiem itjmieslaakan vaalta, mij lea aktede dejstie jeenjemes vuartasjæjjavietseles jïh lyjhkedihks gaarsjelimmijste veartenisnie: treavkavuetjeme. Daelie profesjonelle daltesisnie gïehtele, jïh lea gellien aejkien Saepmien åvteste tjoejkeme Arctic Winter Games-gaahtjemisnie. Altese ulmie lea gåhkese båetedh veartenen bööremes treavkavuetjiji gaskem, jïh sæjhta hijven åvteguvvine årrodh saemien noeride.

Peder Funderud Skogvang, Tromsø, lea dej bööremes orreme nöörjen turneri gaskem gellie jaepieh, jïh lea daelie juniortjïertesne nöörjen laantesiebresne. Dïhte sïlpem veelti Nöörjencupesne 2 2018, jïh ruffien 2019 7. sæjjan bööti senior-NM:sne. Dïhte lea hijven åvteguvvine saemien noeride, jïh lea eadtjohke gaarsjelæjja tjïelke saemien identiteetine.

Tuva Sirin Schall Mikkelsen, Oslo, lea jïengehockeyem spealadamme gellie jaepieh jolle daltesisnie, jïh jienebh bronsemedaljh jïh göökte sïlpemedaljh vaalteme. Dïhte lea eadtjohke gaarsjelæjja, jïh dïejvesem ironwoman åådtjeme eliteseerijisnie jïengehockeyesne. Dïhte vuesiehtamme aaj saemien noerh maehtieh gåhkese båetedh gaarsjelimmine mah eah leah dan sïejhme Saepmesne.

Aarebi vitnijh:

2008:

Finn Hågen Krogh (treavka)

Odd Isak Kappfjell (judo)

2011:

Gaarsjelimmiestipeende: Christer Kjønsø Karlsen, Silje Wilsgård jïh Marie Sofie H. Hætta

Kultuvrestipeende: Marja Helena Fjellheim Mortensson

2014:

Gaarsjelimmiestipeende: Ole Mathis 

Sara Nedrejord jïh Aslak Ole Eira

Kultuvrestipeende: Ina-Theres Andrea 

Sparrok, Sarakka Gaup jïh Anne Maia Raanes Sørensen

2016:

Gaarsjelimmiestipeende: Rakel Birkeli jïh Jan Arthur Reinås

Kultuvrestipeende: Anna Linea Fjellheim Varsi jïh Ella Marie Hætta Isaksen

2018:

Gaarsjelimmiestipeende: Benedicte Guttorm jïh Sajane Karina Olsen

Kultuvrestipeende: Anna Kaisa Partapuoli jïh Johan Daniel Turi

Seedth mijjese dïejvesem

Your email address will not be published. Required fields are marked *