Staateministere Erna Solberg. Guvvie: Thomas Haugersveen

Staateministere Saalboge-tjåanghkoem tjarke laajhta

Staateministere Erna Solberg jeahta satne tjarke joekehtsgïetedimmien vööste girrie etnihkeles våaroemisnie. Dïhte dam vuestie- saemien tjåanghkoem måjhtele mij Saalbogisnie öörnesovvi.

–Tjuara sïerredimmiem saemijste itjmieslaakan vaeltedh, staateministere Erna Solberg aktene tjaalegisnie tjaala Stoerredigkien nedtesæjrosne.

Staateministerem noerhki baanese båetedh

Lars Haltbrekken dïhte, Sosialisteles Gårroehkrirrien stoerredigkiepolitihkere mij staateministere Erna Solbergem haasteme baanese båetedh dan vuestie-saemien tjåanghkoen bïjre Saalbogisnie mij öörnesovvi ruffien aalkoelisnie. Haltbrekken tuhtjie joekoen rovnege siebrie EDL, Organisasjonen for etnisk og demokratisk likeverd, akte årganisasjovne maam såemies vienhtieh rasismem dåarjohte, aktem håalomem tjåanghkosne höölti, jïh öörnedæjjah pryövin aktem saemien dajve-aajhterem tjåanghkoste ålkoestidh. Dïhte daam gyhtjelassem Stoerredigkiepolitihkeri forumasse bïeji:

–Aassjoe jïjtjene aalkoealmetji vööste, saemieh, lea gaatesjen ij nåhkeme. Tjåanghkoe Saalbogisnie lij dajve-aajhteridie, men öörnedæjjah pryövin aktem saemien dajve-aajhterem nyöjhkedh meatan årrodh tjåanghkosne, jïh åadtjoeji ajve tjåanghkoen sïjse båetedh  jis dåajvoehti satne idtji sïjhth mubpide provoseradidh jïh baakoem vaeltedh. Saemiedigkie lea akteraeresne heannadimmien vööste gïrreme. Maahtam staateministerem aaj birredh daan heannadimmien vööste gïrredh?  

Lahtestimmesne Haltbrekken aaj vuesehte Saemiedigkien nænnoestæmman gusnie Saemiedigkie tjarke naeliegïehtjedimmien jïh propagandan vööste tjåanghkosne Saalbogisnie girrie. Aaj Saemiedigkie sov nænnoestimmesne birri staateministere Erna Solbergem, jïh vihties politihkerh dajvesne, daan såarhts dåemiedimmien vööste gïrredh mij aassjoem sjugnede.  

Vuastele

Staateministere Erna Solberg lea lahtestimmiem vaestiedamme jïh jeahta satne joekehtsgïetedimmiem etnihkeles våaroemisnie tjarke vuastele.

–Heannadimmie misse tjirkije Haltbrekken vuesehte, lea gamte ållermaehtemem åådtjeme meedijinie. Jis öörnedæjjah leah aktem almetjem ålkoestamme, jallh voejhkelamme dam ålkoestidh, aktede byögkeles bæjhkoehtamme tjåanghkoste dan åvteste dïhte lea saemie, dellie ij hævvi maehtieh dam jååhkesjidh goh.

Seamma tïjjen leam vïhtesjamme tjåanghkoen öörnedæjjah leah meedijasse soptsestamme ålkoestimmie aktede saemien dajve-aajhteristie ij lij etnisiteeten gaavhtan, jïh öörnedæjjah aaj vienhtieh ij gåaredh naakenem aktede tjåanghkoste ålkoestidh dan åvteste dah leah saemieh, Solberg tjaala.

Seamma vaestiedassesne staateministere jeahta satne biejjieladtje lea aassjoe-lahtestimmieh nedtesne vïhtesjamme.

–Tjuara sïerredimmiem saemijste itjmieslaakan vaeltedh, jïh lahtestimmiesijjine nedtesne maahta gaatesjen biejjieladtje aassjoelahtestimmieh lohkedh. Gosse dan gellie saemieh trïegkenassem, haeniehtimmiem jïh rasismem dååjroeh goh akte dan stoerre maajsoe, guktie dah sijjen saemien identiteetem båarhte veeljieh, dellie tjoerebe dam itjmi2eslaakan vaeltedh, jïh maam akt dejnie darjodh, Solberg jeahta jïh måjhtajahta dovne politihkerh reerenassesne, Stoerredigkesne jïh tjïeltine aktem sjïere dïedtem utnieh saemien gïelh vaarjelidh jïh guhkiebasse evtiedidh, hijven byjjenimmietsiehkieh sjugniedidh saemien maanide jïh noeride, gorredidh båarasåbpoe saemieh aktem hijven voeresehoksem åadtjoeh jïh saemien jielemem evtiedidh. 

–Mov reerenasse sæjhta dam darjodh, aaj åvtese, Solberg jeahta.