Preassagovat

Festivaaleraerieh

Jis daate lea voestes giesien datne edtjh festivaalese, jïh leah jueriedisnie maam byörh meatan vaeltedh? Jallh båeriesbïenjine sjïdteme men ij gåessie gænnah buektiehtamme reaktoe aath meatan vaeltedh? Aellieh raessesne sjïdth. Daesnie såemies raerieh raaktan dutnjien!

1.      Bïjveles vaarjoeh! Jalhts bïjvele mearan biejjie annje lea bijjene elmesne, varke tjåetskeme sjædta iehkedi. Vaeltieh abpesem jïh lijkievaarjoeh ålloste meatan, dellie guhkiem bïerkenh. Lissine juvnehtibie ålloelijniem, skopmehkem jïh tjohpem meatan vaeltedh. Maahta aaj hijven årrodh åeremevoessine jïh dueljine.

2.      Buerie bïevsterh. Buerie bïevsterh leah dïhte voestes maam byörh meatan vaeltedh gosse edtjh festivaalese. Ij guhte vissjh måsnoeh-ravvine speatjadidh.

3.      Åajeldh jårrehtskoffertem. Festivaaledajve lea maaje gïevine jïh lovves, dellie aelhkebe gaajhkem akten voessen jallh veaskoen sïjse rijtedh.

4.      Straejmiebaanghke, antibac, njaameskårhtoeh paehpieristie jïh kondomh. Dellie ih daarpesjh raessesne sjïdtedh jis tellefovne straejmehts sjædta, ohtjegåetieh eah tjoelem utnieh, guhkies raajroeh sjåavkemasse jallh ih daarpesjh tjoeperdidh ovvaajteles nåajsan sjïdtedh.

5.      Gapta! Jis edtjh saemien festivaalese, dellie eevre daerpies giesiegaptine. Maahtah giesiegaptam ”pimpadidh” steeblegigujmie, vaarremegaamegigujmie jallh betniegaamegigujmie.

6.      Eensi gaamegh. Måjhtelh datne edtjh festivaalese Noerhte-Nöörjesne. Jis steeblegh, vaarremegaamegh jallh betniegaamegh meatan åtnah dellie leah ryöjredamme dan noerhtenöörjen geasan.

7.      Tråajjah. Maahtah ebrietråajjam, skåerrietråajjam jïh aegkietråajjam nuhtjedh gaajhki vaarjoejgujmie mejtie meatan åtnah, dovne giesiegaptine ektine.

8.      Stoerre låavthgåetie jallh teelte. Jalhts teelte jallh låavthgåetie stoerre vååjnoe bovresne, tjoerh mujhtedh dov leah jïjnjh dalhketjh meatan. Veeljh buerebh aktem låavthgåetiem jallh teeltem mij lea ånnetji stuerebe goh vïenhth daarpesjh.

9.      Dovres aath gåetesne laahpah. Jis ih sïjhth sæljoem dassedh maam aahkeste eerpih jallh dejtie dovres gaamegidie eerjedh mejtie (nïejte) mïelehke öösti, aellieh dejtie meatan vaeltieh! Festivaalesne ij guhte pryöjjedh mejtie datne gaamegh åasteme Europris-bovresne jallh tråajjam Coopesne.

10.   Beapmoe jïh jovkemes, ij ajve alkohovle. Jis edtjh energijem utnedh speatjadidh biejjeste beajjan, tjoerh måjhtelidh datne tjoerh maam byöpmedidh jïh jovkedh. Ih voeredh jis ajve tjaetsieboehtelem jovkh. Bielelen beapmoe jïh jovkemes, ij heelte gaagnehth.

11.   Biejjieprælloeh. Dellie tjelmieh biejjien vööste vaarjelh, jïh maahtah sæjloes festivaaletjelmieh tjïekedh. Ohtsedh dov lustemes biejjieprælloeh.

12.   Voestesviehkieaeskie. Dievhtieh dam Aloe Vera-bådtjine, njimkedahkine skööpemesaejrien vööste, njimkedahkine, OB:ine, paracettine jïh allergijepillerh. Allergijepillerh maehtieh dåvvodh jis fer jïjnjem jovkeme!

13.   Campingstovle. Festivaalealmetjh sæjloeh dah aaj, jïh dellie maahta njaelkie årrodh ånnetji tjahkasjidh. Feeste ij orrejh jalhts juelkide lïegkedh, maahta gujht dovne tjahkan jïh tjåadtjan joejkedh.

14.   Årroeh meatan jïjtje! Edtja damtedh gosse festivaalesne orreme. Joejkh jïh laavloeh dam buaratjommesem maam buektehth, jïh mubpieh tuhtjieh luste joejkem govledh festivaalejerkesne. Gïele bååstede båata åvtelen skuvlem jallh barkoem vihth aalkah.

15.   Fulkh meatan festivaalesne jïjtje, ij tellefovnen tjïrrh. Dov Snap-voelph eah dagke tuhtjh seamma luste festivaale-snaph gellie tæjmoeh vuejnedh. Rijth tellefovnem låamman sïjse, jïh fulkh meatan konsertesne jïjtje.

Lissine juvnehtibie vietseleslaakan mubpiej vööste dåemiedidh, luste utnedh jïh orre almetjigujmie åahpenidh! Jååhkesjh jis dïhte mubpie ”ijje” jeahta, jïh ij sïjhth meatan årrodh. Festivaalejerkie vaeptieh åtna mah maehtieh viehkine årrodh jis mij akt sjugniehtåvva.

Minngemosth vaajtelibie gaajhkh lohkijh aktem tjaebpies jïh lustes festivaalegiesiem åadtjoeh! Gorredidie sinsitniem.