Inger Anne Marie Pulk ja tanzanialaš Margareth Kihulla sávvaba nagodit čoaggit 121 000 ruvnnu mii gáibiduvvo vai Margareth beassá studeantan Sápmái. Privahta govva

– Veahket Tanzania nieidda gazzat oahpu Sámis

Dálá njuolggadusaid vuođul ii sáhte oažžut stipeandda jus ii leat oarje-máilmmis eret. Danin Inger Anne Marie Pulk lea álggahan ruhtačoagginakšuvnna veahkehan dihte tanzanialaš Margareth Kihulla lohkat mastera eamiálbmotjournalistihka Sámi allaskuvllas. 

– Dan rájes go ráđđehus heaittihii Loatnakássa ortnega studeanttaide, geat eai leat oarje-máilmmis eret, de šaddet dát studeanttat ieža háhkat 121 000 ruvnnu ovdalgo sáhttet oažžut studerenlobi. Ortnega haga massá Sámi allaskuvla ja Tromssa universitehta eamiálbmotstudeanttaid, geat muđui searvvašedje eamiálbmotohppui ja eamiálbmotjournalistaohppui. Eai leat galle eamiálbmotstudeantta, geain leat dakkár ruđat, lohká Inger Anne Marie Pulk gii persovnnalaččat lea álggahan Spleis-ruhtačoaggima Margareth Kihulla ovddas ja sávvá nu ollugiid go vejolaš veahkehit vai Kihulla beassá lohkat eamiálbmotjournalistihka mastera Sámi allaskuvllas. 

– Lea hui suddu go buorit ortnegat leat jávkan ja ahte eamiálbmotstudeanttat šaddet priváhta olbmuid ohcat sponsorin. Guhkit áigái ii leat dat buorre institušuvnnaide, Sámi allaskuvlii ja Tromssa universitehtii, go ožžot dušše dihto lágan eamiálbmotstudeanttaid oahpuide, lohká son.  

Deaivvai Margaretha Tanzanias

Pulk lea álo áŋgiruššan eamiálbmogiid ovdii ja lea maiddái Mama Sara stivrras. Son lea ovdalge  rekrutteren eamiálbmotstudeanttaid Tromsii ja Guovdageidnui. Su bearaš lea maiddái leamaš guossebearašin Tanzania bárdnái, gii bođii Sápmái muhtun NORAD-prošeavtta olis. 

Maŋŋel dan lea Pulk ja su bearaš doallan oktavuođa ja galledan bártni Tanzanias. Doppe Pulk deaivvai maid Margareth Kihulla.   

– Mun ja mu gánda mátkkošteimme golbma vahku Tanzanias. Dan mátkkis deaivvaime Margareth, gii áiddo lei leamaš guhtta mánu Norggas. Sus lei mediaoahppu, ja mun jurddašin ahte son livččii hirbmat buorre studeanta eamiálbmotjournalistihkas Sámi allaskuvllas. Margareth ozai ja beasai maid journalistihka ohppui, muitala son.

Čoaggá ruđa SPLEIS bokte

Dál Pulk geahččala čoaggit SPLEIS bokte 121 000 ruvnnu vai Margareth beasašii Sápmái. Son lohká leat hoahppu, go skuvla álgá borgemánus.  

– Jus eat nagot lahkage dan 121 000 ruvnnu čoaggit, de Margareth oažžu ruđaid jus lea unnit go 10 000 ruvnnu. Jus lea eambbo de ruđat vurkejuvvojit seastinkontui, vai boahtte jahkái boahtá ávkin Margarethii dahje eará studentii, gii ii leat oarjemáilmmis eret. Duođaid gal sávan min nagodit čoaggit dan mađe ruđa ahte Margareth lea dáppe čakčat, lohká Inger Anne Marie Pulk. 

– Vahát Sámi allaskuvlii 

Lea hirbmat vahát Sámi Allaskuvlii go eamiálbmogat eai oačču stipeanddaid ja loanaid nugo oarjemáilmmi studeanttat ožžot go bohtet Norgii. Nu lohká Sámi allaskuvlla rektor Gunvor Guttorm. 

– Mu mielas lea hirbmat buorre go olbmuin lea solidaritehtajurdda, ja go háliidit veahkehit, ja addit vejolašvuođa eará guovlluin máilmmis váldit eamiálbmotoahppu Sámi allaskuvllas, lohká son Inger Anne Marie Pulk ruhtačoaggima birra. 

Sámi allaskuvllas leat fálaldagat maiddái eamiálbmot studeanttaide. Danne lohká son hirbmat vahágin go doarjjaortnet ii gusto studeanttaid geat ásset oarjemáilmmis. Ovdal lei vejolaš buohkain ohcat Statens Lånekassasruhtadoarjaga vai besset Norggas studeret. 

– Lea hui vahát midjiide dan dihtii go min fálaldagat leat heivehuvvon studeanttaide geat bohtet eará eamiálbmotguovlluin, ja geat eai gula njuolgut oarjemáilbmái. Mii leat nannemin iežamet eamiálbmot profiilla, ja mu mielas lea dehálaš ahte mii vuostáiváldit studeanttaid eará eamiálbmotguovlluin, ja nu dáppe guovllu studeanttat ožžot liigeárvvu go muosehit mo eará guovlluid dilli lea, lohká Guttorm.

Eanet dieđuid gávnnat “Hjelp tanzaniansk student til Sapmi” -Facebook siiddus. Jus dáhtut veahkehit de mana deike: Spleis