GILVVU ŠELGOT EARÁ BEAKKÁLMASAIGUIN: Dá leat sámi presideanttat ja sin nieiddažat rukses-máhttávázzime fárrolágaid eará beakkálmasaiguin. – Oba máilmmi stuora vásáhus, lohká Sámiráđi presideanta Åsa Larsson Blind.

Šelgo dego máilmminásttit

Sámi presideanttat ja presideanttaid nieiddažat eai lean goassege niegadange beassat Hollywoodii ja velá geahččat Frozen 2 máilmmi vuosttaščájáhusa. – Wow lei juo somá, lohket presideanttat ja sin nieiddažat.

BUOT GOVAT: Sámedikki preassagovat

 

Wow lei juo somá Frozen 2 oaidnit

sámi presideanttat ja sin mánát

Rukses máhttá, beakkálmasat ja albma albma “glitter & glam”. Dan besse sámi presideanttat ja sin nieiddažat vásihit bearjadaga čuovganeapmái. Sámiráđi presideanta Åsa Larsson Blind lohká dán stuora vásáhussan sihke ollesolbmuide ja mánáide.


OLU BEROŠTUMI GÁVTTIID DIHTE: gal lei nu máilmmi somá. Hui olu olbmot ja hui olu journalisttat ja govvideaddjit. Ja visot dát válddii hirbmat guhkes áiggi. Mii leimmet buohkat čiŋadan gávttiin ja oaččuimet olu beroštumi gávttiid dihte

- Frozen 2 lei mu mielas hui buorre filbma ja lei nu somá go viimmat beasaimet geahččat dan. Mii leat vuordán oba guhká ja mii illudit vel eambbo dan sámi filmma geahččat, lohká Sámiráđi jođiheaddji Åsa Larsson Blind telefon geažes njuolgga maŋŋel go lávkeje kinosálas.

Eai lean dušše beakkálmasat geat ledje gárvodan máilmminástin. Maiddái sámi ovddasteaddjit ledje coggan iežaset čábbámus čiŋaid ja šelgo gilvvu máilmmi beakkálmasaiguin.

– Dat gal lei nu máilmmi somá. Hui olu olbmot ja hui olu journalisttat ja govvideaddjit. Ja visot dát válddii hirbmat guhkes áiggi. Mii leimmet buohkat čiŋadan gávttiin ja oaččuimet olu beroštumi gávttiid dihte. Olbmot gal fuomášedje min, justa nugo lávejitge go coggat gávttiid, lohká Blind.


RUKSES MÁHTÁ ALDE: Sámi ovddasteaddjit besse maid journalisttaiguin deaivvadit. CNN jearahalai sámi presideanttaid ja sii besse muitalit stuora mediaide sámi ja Disney ovttasbarggu birra. 

Vaikko Frozen neavttárat, filbmadahkkit ja eará beakkálmasat diehttelasat ožžo eanemus beroštumi de besse presideanttat ságastit máŋggain journalisttain. CNN jearahalai sámi presideanttaid ovttasbarggu birra. 

– Dat dieđusge lea nu ahte min mielas lea dat ovttasbargu deháleamos ja dan mii beasaimet muialit. Mii leat duhtavaččat. Frozen 2 lea hui buorre muitalus, justa nugo juo Disney filmmat álo leat. In hálit nu dan sisdoalu muitalit, vai lea gelddolaš earáide ge. Váldokarakterat ledje mielde ja Sámis inspirerejuvvon olbmot. Vaikko dát lea Disney filbma, ja sin muitalus, de min mielas lea verddejoavku dahkan buori barggu veahkkin hábmet dán filmma. Mii dovdat elementtaid ja mii oaidnit ahte dat leat Sámis inspirerejuvvon. Lea buorre bargu dahkkon, rámida Blind.

Bearjadaga čuovganeapmái, namalassii diibmu 0400 (Norgga áiggis) lei Frozen 2 máilmmi vuosttaščájálmas. Oassin šiehtadusas gaskkal Sámedikkiid, Sámiráđi ja Disney Animation lei ahte bovdejuvvojit máilmmi vuosttaš čájáhussii. 

Dan sadjái go váldit mielde eallinguimmiid, de presideanttat ledje váldán mielde iežaset nieiddažiid. Nieiddažat Gudrun Ellá Márge Nutti (10) Ida Elisa Blind (10), Elli-Då´mnn Aikio ja Inga Ristin Nystø Keskitaloin (11) ledje beassan váhnema mielde Hollywoodii. Sii leat nu duhtavaččat go besse vásihit dán, go dákkár bovdehusa eai dáidde šat goassege oažžut. 


BESSE GALLEDIT WALT DISNEY ANIMATION STUDIO: Presideanttat ja sin nieiddažat gallededje Walt Disney Animation Studios beaivvi ovdal Frozen II máilmmičájáhusa. Sii besse deaivvadit olu beakkán filbmabargiiguin, oahppat sin historjjá ja gullat movt ráhkadit filmmaid. Animation studios besse maid ođđasit deaivvadit  Frozen-buvttadeddjiin, Peter Del Vechoniin, gii muitalii man olu návccaid geavahedje juohke áidna detáljii Jikŋon II -filmmas. 

– Oooh dat lei nu somá, lohket presideanttaid nieiddažat oktii njálmmiid filmmažis maid leat sádden mediaide.

Sii ožžo maid olu beroštumi gávttiid dihte. Nieiddažat ge adde jearahallamiid journalisttaide. 

– Sii jerre mis makkár karakteraid mii liikot buoremusat ja dat gal lea Olaf ja Elsa. Dál illudat dan Disney festii vuolgit, go doppe mii soaitit deaivvadit dovddus olbmuiguin. Soaitit deaivat Leonardo Di Caprio, šuohkehit nieiddažat. 

Juo vuossárgga vulggii joavku Hollywoodii. Beaivvi ovdal Frozen II máilmmičájáhusa Sámi presideanttat ja sin nieiddažat gallededje earet eará Walt Disney Animation Studio. Doppe besse gullat olles Disney historjjá, sin barggu birra ja movt sii jurddašit go ráhkadit filmmaid. Animation studios besse maid ođđasit deaivvadit  Frozen-buvttadeddjiin, Peter Del Vechoniin.


HOLLYWOODA GÁVPOGIS: Sámedikkiid ja Sámiráđi presideanttat besse maid vásihit Hollywooda gávpoga. Dá Ruoŧa sámediggepresideanta Per-Olof Nutti nieiddažiinnis Gudrun Ellá Márge Nuttiin (10), Sámiráđi presideanta Åsa Larsson Blind nieiddažiinnis Ida Elisa Blindain (10), Suoma sámediggepresideanta Tiina Sanila-Aikio nieiddažiinnis Elli-Då´mnn Aikioin (10)  ja Norgga sámediggepresideanta Aili Keskitalo nieiddažiinnis, Inga Ristin Nystø Keskitaloin (11). 

- Lei hirbmat miellagiddevaš ja inspirašuvdnan fitnat doppe oahppame Walt Disney rikkis historjjá. Oahpaimet movt dat álggahuvvui ja movt dat bargagohte animašuvnnain. Mii leat hirpmahuvvan man čeahpit Disney Animation bargit leat ja mii oahpaimet maid man olu áiggi ja návccaid geavahit juohke áidna smávva detáljažii, nugo movt dat barge Frozen 2:in. Min sávve bures boahtin ja mii leat nu giitevaččat go dáhttot juogadit iežaset barggu minguin. Dá de lea dat duohta Verddevuohta ja mii illudit leat dáppe, lohket sámi presideanttat. 


WALK OF FAME: Šattai maiddái áigi vánddardit gávpogis. Dá vásihit beakkán Walk of Fame.

Earet stuora vásáhusa, de sámi ovddasteaddjit ledje doppe dikšume oktavuođaid boahttevaš vejolaš ovttasbargguide. Okta mihttomeriin lei čájehit máilbmái ahte lea vejolaš ovttasbargat Disneyin ovdalii go duhtat dasa ahte filbmabuvttadeaddjit jearakeahttá geavahit kultuvrra.  Disneys lea leamaš ráđđeaddijoavku sihkkarastin dihte ahte visot filmmas šattašii riekta ja vai eai nanne stereotypiijaid sámiid birra.