Várrepresideanta Christina Henriksen.Govva: Kenneth Hætta/Sámediggi

Sámiráđđi lágida čállingilvvuid mánáide ja nuoraide

Sámiráđđi bovde sámi mánáid ja nuoraid searvat čállingilvvuide. Gilvu lea 6-30 jahkásaš mánáide ja nuoraide ja das leat vihtta ahkeluohká.

Vuoittut leat 100.000 kr ovddas ja buoremus čállosat almmuhuvvojit.

Čállosat galget čállojuvvot man nu sámegillii, ja čálli oažžu ieš válljet čállosa hámi. Sáhttá leat novealla, dikta, ráhkisvuođačálus, issoras čálus, ráidogovva, máinnas, muitalus, duohta dáhpáhus, fáktateaksta dahje mii nu áibbas eará. Nuoramusat sáhttet sárgut ja čállit govvateavstta sámegillii.

- Mun lean nu ilus go mii sáhttit fállat dákkár vejolašvuođa iežamet mánáide ja nuoraide dál go lea riikkaidgaskasaš eamiálbmogiid gielaid jahki. Sávašin ahte gilvvut hástalit ja movttiidahttet sin čállit sámegillii, dadjá Sámiráđi várrepresideanta Christina Henriksen.