Sámediggeráđi Henrik Olsen. Govva: Åse M.P. Pulk/Sámediggi

Sámi girjjálašvuođa nannet 5,1 mill. ruvnnuin

Sámediggeráđđi evttoha geavahit 5,1 mill. merkejuvvon ruvnnu eambbo 2020 bušeahtas sámegiel girjjálašvuođa buvttadeapmái ja gaskkusteapmái. Dat lea buorre ođas midjiide buohkaide geat liikot sámi girjjálašvuhtii, dadjá sámediggeráđi Henrik Olsen.

Dan oktavuođas go Sámedikki dievasčoahkkin mearridii heaittihit dálá doarjjaortnega sámi girjebussiide, lea sámediggeráđđi ráhkadan sámi girjjálašvuođastrategiija, mas mihttomearrin lea nannet sámi girjjálašvuođa gaskkusteami ja buvttadeami.  

Sámediggeráđđi áigu geavahit eanet ruđaid sámegiel girjjálašvuođa buvttadeapmái ja sámi girjjálašvuođa gaskkusteami nannemii. 

- Mii háliidit fállat buori girjjálašvuođa buot buolvvaide buot sámegielain. Danne evttohit lasihit doarjaga ođđa almmuhemiide 5,1 mill. ruvnnuin 2020 bušeahtas. Dat leat ruđat mat sirdojuvvojit dan ruhtaseahkas mii dássážii lea mannan girjebussiide, dadjá sámediggeráđi Henrik Olsen.

Dál orru nu ahte gávcci sámi girjebusses, mat leat ožžon doarjaga Sámedikkis, viđas háliidit girjebussedoaimma joatkit ođđa ortnegiin. Dasa biddjojuvvo 2,5 mill. ruvnnu. 

Áigu nannet lohkanmiela ja čállinilu

Sámediggi oaidná maid dárbbu eanet diđolaččat sámi girjjálašvuođa gaskkustit mihttomeriid ektui vai beroštupmi sámi girjjálašvuhtii lassánivččii ja vai oččošeimmet eanet lohkkiid. Sámedikki sámi girjjálašvuođastrategiijas leat doaibmabijut mat galggašedje movttiidahttit sihke lohkan- ja čállinmiela.  

- Lea dađibahábut nu ahte almmuhuvvo menddo unnán sámi girjjálašvuohta. Mii jáhkkit ahte lohkanmiela movttiideapmi maid movttiidivččii čállinmiela. Girjjálašvuohta iežas gillii lea deaŧalaš identitehtii ja giela stáhtusii, ja dat ovddida sihke lohkan-, čállin- ja hállangelbbolašvuođa iežas gielas. Dat lea maid deaŧalaš go áigu mánáide ja nuoraide oahpahit girjjálašvuhtii liikot, maiddái ollesolbmo agis, dadjá Olsen.

Gaskkustanvirggit ásahuvvojit 

Sámediggeráđđi evttoha ásahit sierra gaskkustanvirggiid julev- ja máttasámi giellaguovlluin. Virgi máttasámeguovllus ásahuvvo Sijti Jarngi ja virgi julevsámi guovllus fas ásahuvvo Árran julevsám guovdásji.

  - Dát virggit galget bargat lagat ovttasbarggu ásahemiin iešguđet ásahusaid gaskka oainnusmahttin dihte sámi girjjálašvuođa iešguđetlágan lágidemiid láhčimiin ja máhtu lasihemiin sámi girjjálašvuođa ja kultuvrra birra, earret eará bibliotehkain, dadjá sámediggeráđđelahttu. 

Go lea sáhka sámi girjjálašvuođa gaskkusteamis davvisámi guovllus, Sámediggi áigu ásahit ovttasbarggu Romssa fylkkasuohkaniin, mii lea juo ásahan sámi bibliotehkabálvalusa Romsii. Ovttasbargu sáhtášii viiddidit dán bálvalusa. 

- Bušehttii lea biddjojuvvon kr 300.000 dán ovttasbargui. Detáljat dan birra ja guovtti gaskkustanvirggi birra julev- ja máttasámi guvlui eai leat vel čielgasat, muhto mii áigut dasa fas máhccat, Henrik Olsen loahpaha.

Eará doaibmabijuid sámi girjjálašvuođastrategiijas váldit mielde sámediggeráđi 2020 bušeahttaevttohussii.