Govva: Samas

Sámi gielladutkit čoahkkanit Ruŧŧii

Gielladutkit čoahkkanit Ruŧŧii, gos vuosttaš háve lágidit sámi giellasymposia.

Dán jagi lágiduvvo sámi giellasymposia Saals - Saami linguistics symposium vuosttas geardde Ruoŧas. Symposia lea ovdal lágiduvvon sihke Norggas ja Duiskkas, muhto dán jagi lea Uppsala universitehta lágideaddjin. Mannan geardde serve sullii njealljelogi gielladutki Sámis ja olgoriikkas.

 – Lea nu somá lágidit doaluid Uppsalas, go mii leat nu guhká bargan sámi gielaiguin dáppe. Dát symposia lea dehálaš čoahkkananbáiki sámi gielladutkiide, dadjá lágideaddji Olle Kejonen, Uppsala universiteahtas.

Ovttastuvvon Našuvnnat leat nammadan dán jagi riikkaidgaskasaš eamiálbmotgielaid jahkin. Dán jagi lea maiddái jur 400 jagi gollan dan rájes go vuosttas sámegielat girjjit almmuhuvvojedje, ja dan nai čalmmustahttet symposias.

 – Lea dehálaš dáhpáhus, ja danin loktet erenoamážit sámi čállingielaid ja sámi girjjiid historjjá symposias, dadjá Kejonen.

 Giellasymposia lágiduvvo skábmamánu 14.-15. b. 2019.