Sosialisttalaš gurutbellodaga stuorradiggeáirras Torger Knag Fylkesnes muittuha, ahte Norgga ráđđehusas leat geatnegasvuođat ON ektui. – Ráđđehus dat galgá gieđahallat ON ávžžuhusa, iige diggegoddi. Lea imaš go ON reive ii leat meannuduvvon, vaikko lea sáddejuvvon juo guovtti mánu áigi, lohká son. 

– Ráđđehus nollá Jovsset Ántte áššiin

Sosialisttalaš gurutbellodaga stuorradiggeáirras Torger Knag Fylkesnes imašta manne Norga ii leat velge sealgan ON ávžžuhusa gieđahallat. Ráđđehusadvokáhtta lea su dieđuid mielde guokte mánu juo bargan áššiin. 

– ON sáddii ávžžuhusa juo ovdal geasi, ja ráđđehus ii leat velge mearridan galgá go dohkkehit ja čuovvulit komitea, man leat geatnegahtton guldalit. ON olmmošvuoigatvuođakomitea lea sádden ávžžuhusa Norgii 5 dahje 6 geardde. Muhtimiid dáin ávžžuhusain leat soahpan rievdadit, muhtin ávžžuhusaid ON lea geassá ruovttoluotta ja muhtumiid fas lea Norga dohkkehan ja čuvvon. Ii goassege ovdal leat Norga hilgon ja badjelgeahččan ON olmmošvuoigatvuođakomitea ávžžuhusa. Jovsset Ánte Sara áššis ii leat ráđđehus vel oba mearridan ge galget go čuovvut ávžžuhusa vai eai, ja dat lea oktanaga go hálddahus pláne bággonjuovvama, lohká hirpmástuvvan Sosialisttalaš gurutbellodaga stuorradiggeáirras Torger Knag Fylkesnes SÁMi ođasmagasiidnii.

Guokte mánu juo meannudan

Geassemánu 26. beaivvi dat ON olmmošvuoigatvuođakomitea sáddii Norgga ráđđehussii reivve, mas ávžžuhedje vuordit bággonjuovvamiin dassái go komitea gieđahallá Sara ášši. Sara lea dán komiteai guoddalan ášši maŋŋel go 2017:s vuoittáhalai stáhta vuostá Alimusrievttis. Dál lea reive ráđđehusadvokáhtas. Dábálaš áššejođiheapmi dás lea ahte ráđđehusadvokáhtta gieđahallá ášši ja sádde dasto Justiisa- ja gearggusvuođadepartemeantta, Olgoriikadepartemeantta ja Eanandoallodepartemeantta viidáset gieđahallamii. 

Dan botta go ráđđehus lea guokte mánu juo gieđahallan ON ávžžuhusa, de Eanandoallodirektoráhta lea ráhkkaneame ovttas politiijain, fylkkamánniin ja Biebmobearráigeahčuin bákkuin njuovvat Jovsset Ánte Sara ealu. Ráhkkananbarggut álge go Nuorta-Finnmárkku diggegoddi borgemánus celkkii, ahte stáhta sáhttá ON ávžžuhusas beroškeahttá čađahit bággodoaimmaid. 

– Eai han dát instánssat sáhte ON ávžžuhusa gieđahallat. Ráđđehusa bargu dat lea. Nugo mun lean ipmirdan, de lea ášši dál ráđđehusadvokáhta duohken. Imaštan sakka go lea ádjánan juo guokte mánu dáinna áššin. Jus mat dál bákkuin njuovvagohtet, ja buot instánssat nugo politiija, Eanandoallodirektoráhta, fylkkamánni ja Biebmobearráigeahčču servet, de sii čađahit dan justa danne go eai leat ožžon eará dieđu, lohká Knag Fylkesnes.

Vuordá ráđđehusa guldalit ON

Knag Fylkesnes lohká, ahte jus Ráđđehus ii gieđahala ON ávžžuhusa ovdal go bággodoaimmat leat juo dáhpáhuvvan, de dat duolvvida Norgga nama. Norga oainnát dalle duššindahká Norgga geatnegasvuođaid ON ektui. Knag Fylkesnes lea bivdán vástádusa Eanandoalloministaris dán áššis. 

– Mun vuorddán ahte sii gieđahallet ávžžuhusa dál jođánit ja ahte ráđđehus guldala ON. Jus eai guldal ja čuovvul ON ávžžuhusa, de Norga rihkku iežas geatnegasvuođaid dasgo leat ratifiseren  politihkalaš ja siviila vuoigatvuođaid konvenšuvnna ja nu dohkkehan ON olmmošvuoigatvuođaid ollislaš váiddaorgánan. Dán áššis balan ahte Ráđđehus duššindahká ON, lohká son. 


– Ráđđehus berre vuordit dál bággodoaimmaiguin, lohká Guovddášbellodaga Trygve Vedum SÁMi ođasmagasiidnii.  Dá lea Vedum galledeame Kárášjoga Guovddášbellodaga álbmotčoahkkima, gos ságastedje gielddapolitihkas.
 

Guovddášbellodat maid bargá áššiin

Maiddái Guovddášbellodaga stuorradiggejoavku dáhttu dál vástádusa manne ráđđehus ii leat meannudan ON ávžžuhusa. Go ášši lei Stuorradikki meannudeames, Guovddášbellodat ii dorjon eanetlogu, mii dáhtui bággodoaimmaid čađahit.

– Mii oaivvildit ahte fertejit vuordit bággodoaimmaiguin, nu guhka go ášši lea ON hálddus, lohká Guovddášbellodaga jođiheaddji Trygve Vedum.

Vedum lea čuvvon ášši ja rámida Jovsset Ánte Sara.

– Son orru oba gievra ja nanus, nu mii olggobealde olbmot goit vásihit, muhto ipmirdan ahte lea lossat bargat dáinna áššiin. Dás leat maid olu olmmošlaš bealit, ja mii oaivvildit ahte ii galgga hoahpus maidege dahkat, lohká son ja dáhttu dál Guovddášbellodaga sámi ovddasteddjiiguin ja NBR:in ságastit movt dál bargat ráđđehusa ektui ovdal plánejuvvon bággodoaimmaid.

 

Dá lea ášši:

Jovsset Ánte Sara áššáskuhtii stáda go stáda mearridii boazologu geahpedeami oktavuođas ahte Jovsset Ánttes eai galgga go 75 heakka. Ášši lea jorran Norgga riektevuogádagas masá čieža jagi juo. Sara vuittii digge- ja lágamánnerievttis. Alimusriekti fas doarjjui stáda 2017. Sara de váiddii ášši ON Olmmošvuoigatvuođakomiteai. 

ON ii leat geargan vel árvvoštallat Sara ášši ja lea ávžžuhan Norgga maŋidit bággodoaimmaid dassái go komitea geargá bargguinis. Nuorta-Finnmárkku diggegoddi ii oaidnán dárbbu ON jeagadit ja celkkii borgemánu 13. beaivvi ahte stádas lea riekti fámuin njuovvat Jovsset Ánte Sara ealu.