Riddu Riđu festiválas lávejit almmuhit geat boahtte Ofelaš joavkun šaddet. Diibmá ofelažžan almmuhuvvojedje Riddu Riđus Vanja Tørresdal, Maria Gunilla Påve Wilks, Eli Karianne Vesterheim Hætta ja Elle Karen Inga Skum. Govva: Anne Berit Anti

– Oza don ge Ofelažžan

Plassjelaš Vanja Tørresdal (21) lea okta dán jagi ofelaččain, geat leat johtán miehtá Norgga muitaleamen sámiid birra nuoraide. Son ii gáđa sekundda ge ja hásttuha dál eará sámi nuoraid ohcat ofelažžan.

– Dál nohká mu áigodat ofelažžan. Lea veahá ártet ja váivi. Lean vásihan nu olu, inge gáđa in sekundda ge, ahte ohcen ofelažžan diibmá. Mun duođaid ávžžuhan buohkaid ohcat bargui ofelašjovkui. Don oahpat nu olu sihke earáid birra, iežat kultuvrra birra ja iežatge birra, lohká Vanja Tørresdal (21) SÁMi ođasmagasiidnii.

Jus háliidat ohcat, de fertet doapmat, go ohcanáigemearri lea geassemánu 1. beaivvi. Dárkilut dieđuid gávnnat siiddus www.samiskeveivisere.no dahje Facebook-siiddus “Samiske veivisere”. 


– In goassege vajáldahte áiggi ofelažžan. Lea veahá váivi ja ártet go dál gearggan, lohká Vanja Tørresdal (21).  Govva: samiskeveivisere/ofelaš

– Oba fiinna jahki leamaš

Vanja Tørresdal, Maria Gunilla Påve Wilks, Eli Karianne Vesterheim Hætta ja Elle Karen Inga Skum leat leamaš ofelaččat skuvlajagi 2018/2019. Ofelaččat leat dálvvi ja giđa johtán miehtá Norgga muitaleamen nuoraide sápmelaččaid birra. Vanja ja Maria Gunilla maŋimuš skuvlagalledeamit ledje Longyearbyen skuvllas, Svalbárddas, ja Strinda joatkkaskuvllas Troandimis.

– Lei hui fiinna loahpaheapmi ja stuora vásáhus fitnat Svalbárddas. Mus ii oba leatge lohku galle skuvlla mii leat galledan. Dasa lassin leat New Yorkas ge fitnan. Earet skuvlagalledemiid, de leat duođaid beassan oahpásnuvvat Norgga guovlluide. Leamaš olu sightseeing, vásáhusat ja hui sosiála. Mii leat oahpásnuvvan nu olu nuoraiguin miehtá riikka ja ofelažžan bovdejuvvot duoid dáid doaluide. Lean maid ožžon hui lagas ustibiid daid eará ofelaččaid searvvis. Jus fal lea sosiála, liikot johtit ja ovttasbargat, de lea dát juoga masa berret ohcat, lohká Vanja. 


– Ofelašjahki lea leamaš dát kulamus ja somámus jahki mus goassege, mun lean beassan vásihit nu olu, lohká Elle Karen Inga.  Govva: samiskeveivisere/ofelaš

213 000 ruvnnu stipeandan ja 60 oahppočuoggá

Ofelašdoaimma ráđđeaddi Marie Elise Nystad lea dál ohcame njeallje ođđa ofelačča boahtte skuvlajahkái. Ohcanáigemearri lea geassemánu vuosttaš beaivve. Ođas dán jagi lea ahte ofelaččat ožžot 60 oahppočuoggá ofelašjagi ovddas, ovdal leat ožžon dušše 30 oahppočuoggá. Ofelaččat ožžot oahpu Sámi allaskuvllas, ovdal go vulget galledit joatkkaskuvllaid. Sii ožžot maid 213 000 ruvnno stipeandan, ja besset vásihit erenoamáš jagi.

– Mii sávvat ahte dát dagaha ahte eambbo sámi nuorat háliidit leat sámi ofelaččat, lohká ofelašdoaimma ráđđeaddi Marie Elise Nystad.

Stuora dárbu ofelaččaide

Dál lávke Vanja eará hástalusaide. Son lohkagoahtá čavčča rájes máttasámi oahpaheaddjeoahpu.

– Dál lean gearggus váldit máttasámi oahpaheaddjeoahpu. Illudan dasa ge. Oahpu man ožžon ofelažžan lea stuorra ávkin dán oahpus ja eará oahpuin ge. Lean čužžon olu ovddabealde lávddis. Ii lean ilgat veaháge. Lei dušše hirbmat somá ja ofelaččaide lea dárbu go eai buot sajiin máhte sámiid birra, lohká Vanja.