Ellinor Marita  válljejuvvoi ođđasit NBR jođiheaddjin. – Boazodoallu lea mu váimmu lagamus, lohká son. Govven: Jan Skoglund

Ođđa luohttámuš Ellinorii

NBR Riikkačoahkkin lea áiddobeliid čađahan jođiheaddji válggaid. Ellinor Marita Jåma joatká NBR jođiheaddjin.

– Ii leat eahpádus ge ahte boazodoallu dat lea mu váimmu láhka ja dalle lea NBR dat rievttes arena, lohká Ellinor Marita Jåma. Son lea áiddo beliid válljejuvvon fas NBR jođiheaddjin. 

Álggus jáhkii Jåma son lea áidna jođiheaddje evttohas. Moadde beaivvi ovdal válggaid dieđihii Jan Ivvár Smuk iežas gilvaleaddjin. Jåma gii lea 2014 rájes jođihan Norgga Boazodolliid Riikkasearvvi dattege oaččui áibbas čielga eanetlogu. 45 jiena oaččui Ellinor. Ovccis jienastedje Smuk.

Jåma váibmu coahkká nu garrasit boazodoalu ovddas, ahte lea válljen eret Sámediggeráđi saji. 

Earet daid stuora politihkalaš áššiid nugo ruvkedoaimmaid, bieggamilluid ja boraspirepolitihkka, de dáhttu Jåma oččodit eambbo miellahtuid organisašuvdna bargui. Son maiddái dáhtušii eambbo nuoraid organisašuvdnii. 

– Lea hui buorre oaidnit ahte nuorat áŋggirdit boazodoallopolitihkas ja ahte hástalit sihke min stivrra ja servodaga. Dat addá munnje fámuid ja vuoimmi. Lea nu máilmmi dehálaš ahte NBR stuorru. Mis leat máŋga lávdegotti ja posišuvnnat masa dárbbašit olbmuid, logai Jåma ovdalaš válggaid.

NBR Riikkačoahkkin lágiduvvoi dán vahkkoloahpa Sommarøy nammasaš sullus Tromssas.