Maret Ravdna Buljo lei hirbmat rámis go Matmerk direktevra Nina Sundqvist ja biebmoministtar Olaug Bollestad geigiiga bálkkašumi. GOVVA: MATMERK

Oaččui Ingrid Espelid Hovig biebmobálkkašumi

Son lea bures dokumenteren ja seailluhan sámi biebmokultuvrra. Nu celkkii jury go geigejedje sutnje Ingrid Espelid Hovid biebmokulturbálkkašumi.

Buohkat geat ledje boahtán dán dáhpáhusa geahččat čuoččahedje ja doško gieđaid go eanandoallo- ja biebmoministtar Olaug Bollestad almmuhii ahte Maret Ravdna Buljo dat oažžu Ingrid Espelid Hoviga biebmokulturbálkkašumi 2019. Bálkkašupmi geigejuvvui Matmerk-fágabeaivvi oktavuođas ja oktiibuot viđas ledje nammaduvvon vuoitokandidáhtan. Nu čállá mark.no.

Buljo lea vuosttaš sápmelaš gii bálkkašuvvo. Son lea maid nuoramus bálkkašumi vuostáiváldi dán rádjai. 

– Buljo lea gierdevaččat ja stuora áŋgirvuođain bargagoahtán dološ gohkkenvuogi mielde. Dat lea máhtolašvuohta, mas lea ávki buohkaide, rámidii bálkkašupmejođiheaddji Liv Gregersen Kongsten. 

Buljo lea Guovdageainnus eret, muhto ássá Loabágis gos isidiin bargaba boazodoalus ja jođiheaba Boazovázzi-guovddáža. Buljo dahká ja háhká biepmu árbevirolaččat. Dáinna gelbbolašvuođain lea bajásšaddan ja dan maid ii máhte lea son roggan historjágirjjiin ja jearahan olbmuin.

– Dát bálkkašupmi mearkkaša olu munnje. Lean ballan ahte mii massit dán árbbi, ja lean čohkken dieđuid min biebmokultuvrra birra. Lea dehálaš seailluhit sámi árbevirolaš biebmokultuvrra, go das sáhttet earátge oahppat movt ráhkadit ceavzilis ja lunddolaš biebmu. Mađi eambbo mun lean oahppan min biebmoárbevierus, dađi eambbo mun ipmirdan man čeahpit min máttut ledje. Sii jurddašedje luonddugáhttema birra ja sii jurddašedje ahte biebmu lea dálkkas, celkkii Maret Ravdna Buljo go oaččui bálkkašumi.

Buljo lea ovdal vuoitán Sápmi Awards -bálkkašumi ja oassálasttii TV-ráiddus ”Smaker från Sápmi”, mii diibmá čájehuvvui SVT:s ja NRK:s. 

Ingrid Espelid Hovig bálkkašupmi geigejuvvui dál 26. geardde. Ovdalaš vuitiid searvvis gávdnat sihke Arne Brimi, Andreas Viestad ja TV2-goahka Wenche Andersen.