Bargiidbellodaga Arild Pettersen Inga ii leat duhtavaš Sámediggeráđi bargovugiin. Priváhta govva

– NSR čiegadii boazodoallostivrra nammadeami

Bargiidbellodaga sámediggejoavku lohká Sámediggeráđi čiegadan barggu nammadit boazodoallostivra lahtuid.

– Njukčamánu 5. beaivvi vuot árvaleimmet nammadit lahtuid boazodoallostivrii, muhto NSR ii dorjon min evttohusa. Lea imaš go min árvalusaid hilgot, seammás go leat “čiegus” konsultašuvnnain ráđđehusain seamma áššis. Sámediggeráđđi čihkosis lohpidii Eanandoallodepartementii čađahit nammadeami. Dan livčče galgan dievasčoahkkimis, lohká Bargiidbellodaga sámediggeáirras Arild Pettersen Inga.

Bargiidbellodat lea ilus go Sámediggeráđđi viimmat lea jorggehan áššis. Dattege reagere Bargiidbellodaga parlamentáralaš jođiheaddji Ronny Wilhelmsen maid bargovuohkái.

- Mii registreret sámediggeráđi politihkalaš jorggeheami imašlažžan. Ii leat buorre go Sámediggeráđđi čielgasit bargá justa nuppe láhkai go maid dievasčoahkkin mearrida, seammás go eai fátmmas eará bellodatjoavkkuid dán proseassas. Čiegus proseassat heajudit sámi demokratiija ja oktavuođa, lohká beahtahallan Wilhelmsen.

Šálloša proseassa

Sámediggeráđđi Silje Muotka ii loga konsultašuvnnaid čiegusin.

– Konsultašuvnnat mat gusket boazodoallolága rievdadeapmái leat bistán 2016 rájes, eaige leat leamaš čihkosis obanassiige. Go Sámediggeráđđi ođđajagimánus deaivvadii dalá ministariin, Bård Hoksrudain, de eat šaddan ovtta oaivilii guđege paragráfa rievdadanárvalusaid hárrái. Dan birra ožžo buohkat dieđu go Sámediggi čoahkkanii guovvamánus. Maŋŋel gulaskuddanáiggi, mii lei njukčamánu 15. beaivvi, de lei čoahkkin stáhtaráđđi Olaug Bollestadain ja doppe čielggai ahte sáhttit fárrolagaid gávdnat čovdosa. Go departemeanta dohkkehii čuovvulit Sámedikki láhkalávdegotti barggu ja ovttas geahčadit boazodoallostivrra, de válljiimet nammadit áirasiid, geaid NBR lei árvalan. Mun šállošan proseassa, muhto dat proseassa ii leat mu duohken leamaš. Dábálaččat eai leat konsultašuvnnat almmolaččat, eaige lean dál ge, čilge sámediggeráđi Silje Muotka. 

– Iigo Sámediggeráđđi jurddašan, ahte dii barggaidet justa nuppe láhkai go maid Sámediggi lei mearridan? Mearrádus lei ahte ii galgga nammadit stivralahtuid.

 – Sámedikkis lei okta mearrádus sámediggedieđáhusas, gos čuožžu ahte galgat árvvoštallat ahte Sámediggi ii nammat stivralahtuid. Sivvan dan mearrádussii lei gáibádus ahte Sámedikkis galgá leat duohta váikkuhanvejolašvuohta stivrras, ahte boazodoallogelbbolašvuohta ja diehtu sámi gielas ja kultuvrras galgá nannejuvvot. Dat ovttaoaivilvuohta bođii departemeanttain ja nu geavai de nammadeapmi. Livččii sávaldat ahte buot sámediggejoavkkut ledje beassat mielde árvalit lahtuid, muhto dán háve ii lean dat vejolaš. Dattege oaivvildan ahte NBR árvalus livččii galgan vuhtiiváldot dál maid, nugo álo leamaš. Dál šaddet eambbo proseassat ja dalle besset buohkat mielde váikkuhit, ja registreren juo ahte bargiidbellodat lea juo sádden árvalusaid, geaid departemeanta berre nammadit, lohká Muotka. 

 

Emneord: