Sámediggepresideanta Aili Keskitalo lohká bahčagin go Risttalaš álbmotbellodagas ii leat ovdamoraš sápmelaččaide. GOVVEN: Sámediggi, Åse Pulk

– Norga signalisere ahte sámiin eai galgga olmmošvuoigatvuođat

Norgga stáhta láhtte dego sámiin eai leat olmmošvuoigatvuođat. Nu oaivvilda sámediggepresideanta Aili Keskitalo.

– Lea dárbbašmeahttun fámostallan go stáhta dáhttu bákkuin njuovvat Jovsset Ánte Sara ealu, go leat ain meannudeame ášši ON vuogádagas. Ii leat stuora ealus sáhka ja eaige leat konsekveanssat vuordit ON mearrádusa áššis. Lea fasti oaidnit movt stáhta gieđahallá Jovsset Ántte.

Nu lohká sámediggepresideanta Aili Keskitalo. Son lea nu beahtahallan. Norgga eanandoalloministtar Olaug Bollestad ii mieđit jeagadit ON go lohká Norga ii leat geatnegahtton dahkat dan. Son lohká boazologu geahpedeami dárbbašlažžan ja go 230 eará boazodoalli leat njuovvan, de šaddá sin ektui boastut, jus Jovsset Ánte Sara galgá báhcit njuovakeahttá. 

– Mun gulan maid son lohká, muhto nugo mun vuohtán sámi servodaga, de jáhkán olbmuin leat dáhttu vuordit. Dasa lassin lea ilgat go eai dáhto guldalit ON:ge. Norga han lea viggame dál beassat ON sihkarvuođaráđđái ja dáhkidit ahte dorjot olmmošvuoigatvuođaid ja ahte sis lea dáhttu nannet ON. Dán áššis eai daga dan, lohká Keskitalo.

ON ii nu dávjá dáhto Norgga vuordit doaimmaid bidjamis johtui. Keskitalo lohká son ii leat vel goassege ovdal gullan ahte Norga livččii hilgon ON ávžžuhusaid.

– Muđuid vurdet, muhto dál go lea sámi áššis sáhka, de eai vuordde. Sii baicce addet signála ahte mis eai leat olmmošvuoigatvuođat. Olmmošvuoigatvuođa konvenšuvnnat eai gusto midjiide.

Maiddái Sámediggi lea čoahkkinastán departemeanttain dán áššis. Sámediggi ávžžuhii vuordit áššiin, nu mo ON olmmošvuoigatvuođakomitea ja ON eamiálbmotáššiid bistevaš forum maid leat ávžžuhan.

– Muhto čoahkkimis eai miehtan dasa. Lea vel báhčasabbot go garraseamos dán áššis lea Risttalaš Álbmotbellodat, mas lea ovdamoraš válgaprográmmas. Ovdamoraš ii gávdno go fámuin dáhttot njuovvat. Beroškeahttá bággodoaimmain, de boahtá ON duopmu. Jus dat duopmu doarju Jovsset Ánte Sara, de das šaddet váikkuhusat, lohká Keskitalo.