Muittát go vuoiŋŋastit, beroštit ja atnit fuolas?

De leat juovlabasit lahkoneame olles leahtuin. Eanaš skeaŋkkaid leat oastán ja dolvon. Eanaš viesuin šearrá juovlanásti ja eadni lea láibume ja áhčči lea viežžame juovlamuora. Mánát illudit dassái go juovlanigá boahtá ja dassái go besset juovlalávlagiid lávlut, juovlabeazi birra váccašit ja dieđusge rahpat skeaŋkkaid, olu skeaŋkkaid. 

Nu lea juovlaniehku. Nie háliidit eatnašat ávvudit juovllaid. Dattege lea duohtavuohta olu ruovttuin áibbas eará. Mun lean varra okta sis gii in oba astta ge čiŋahit, bassat ja láibut juovllaide. Árgabeaivve hušša čuovvu mielde maiddái juovlabasiide ja lea bures dahkkon jus násti ihtá mu lásii ovdalgo juovlaruohtta lea meaddil juo. 

Muhto mu jurdagat eai leat sin luhtte geat astet dahje eai astta juovllaide ráhkkanit. Mu jurdagat leat sin luhtte, geain ii leat nu buorre dilli ja gean dilli vearáska bassebeivviid oktavuođas. Leat oba olu mánát geat gillájit váhnemiid alkoholageavaheami dihte. Leat oba ollugat geat gártet okto dahje geafivuođas ávvudit juovllaid. Leat oba ollugat geat gártet juovllaid basuhit institušuvnnas.

Mii leat dán nummirii čohkken beakkálmasaid jurdagiid juovlabasiid birra. Muhtimat sis eai ávvut ja eatnašat dáhttot vuoiŋŋastit ja čohkket návccaid ja fámuid juovlaluomus. Neavttár Sarakka Gaup lohká ahte jus streassa ja kapitalisma eai ráđđe su juovllaid, de juovllat orrot lihkustuvvan. Su buoremus juovlaskeaŋkaráva lea iežas áiggi addit ja dat lea mu mielas jierpmáleamos sávaldat man lean guhkes áigái gullan. 

Lea dehálaš iežas áiggi geavahit lagamusaide, ja danne ávžžuhan ge du geahčastit iežat birrasii. Gii du lagasbirrasis dárbbaša du áiggi? Leago gránnjámánná? Leago áhkku dahje áddjá boarrásiidruovttus vai leago muhtin gii dovdá iežas okto, gean sáhtášit fátmmastit ja bovdet guossái? 

Ja go juo lihkká leat juovlaskeaŋkkaid oastime iežat lagas olbmuide, geahčas mat buvddain, leago doppe gávppašanvovdna gosa sáhtát nahkehastit skeaŋkkaža dahje biepmu dárbbašeddjiide? Skeaŋka maid dohko nahkehat, mearkkaša oba olu dan olbmui, geas ii leat ráđđi addit iežas mánnái juovlaskeaŋkkaža. Dat skeaŋka ja du áigi leat mielde muhtin olbmo juovllaid buorideame.

 

Ráfálaš juovllat! 

Emneord: