Preassagovat

MII GEAVVÁ SÁMIS?

Dán vahku dáhpáhuvvá Sámi oarjjimus riikka oaivegávpogis, namalassii Oslos.

Navddiime iežame sáhttit šaddat orákelin, muhto de oaččuime barggu. Ja eallima. Eange velge dieđe maidige musihka, dáidaga, filmmaid, teáhtera, girjjálašvuođa, valáštallama eange semináraid birra. Bures boahtin SÁMi Magasiinna Mii Geavvá -siidui!

Dán vahku dáhpáhuvvá Sámi oarjjimus riikka oaivegávpogis, namalassii Oslos. Dán vahku ávvudit maid hállemasaid (amma Halloween šattai árbevierrun Sámis maid jo?) – ja dán jagi álggii digaštallan gárvodallama birra ereliiggán árrat. Na, Siv Jensen dat álggahii. Shoutout buohkaide, geat viššet kommenteret ja digaštallat vilges norgalaččain. Sávve liikká buohkaide somás halloweena!

Musihkka

ISÁK doallá guokte konseartta Oslos boahtte vahkkoloahpa. Ii funetge! ISÁK leage bivnnuheamos musihkkajoavku Sámis dán áigge. Dat čuojahit … JUOHKE SAJIS! Dat ledje buot festiválain geassit, ja dál GUOKTE konseartta seammá gávpogis seammá vahkkoloahpa. Oslolaččat leat lihkolaččat, sáhttet válljet: IDJA golggotmánu 27. b. dahje SALT Art Music golggotmánu 28. b.

Sámi Mariah Carey, ubmilaš gáhtamusihkar Natalie Carrion, gii diibmá loaiddastii vuosttaš háve festiválas, namalassii Márkomeanu Nuoraid Sessionsas, almmustahttá ođđa skearru. Lávvardaga golggotmánu 28. b. lea skearrualmmustahttinkonsearta Tráhppies, Upmis. Moai vurde gealdagasas sihke skearru ja konsearttas, ja sávve beassat gullat ollu Natalies lagaš boahtteáiggis.

Leatgo jurddašan goassige makkár šuoŋat Harald Hårfagre ja Snøfrid gaskkas ledje? Na ean moaige. Dál beasat goit gullat, jos háliidat. Golggotmánu 28. b. boahtiba Georg Buljo ja Marja Mortensson Oslo Riksscenii čájehit sudnos diŋgojuvvon konseartta Snøfrid. Buljo lea ávvujagi gudnin viežžan inspirašuvnna gonagas Harald Hårfagre náittoslihtus sámi Snøfrid Svåsedatteriin, man boađusin riegádedje Norgga gonagaslaš árbbolaččat, aistton Snorre.

Čájálmasat ja filmmat

Oslo Cinemateket čájeha Sameblod golggotmánu 29. b. Don gii dán logat leat sihkkarit jo oaidnán filmma, muhto dan gánneha geahččat nuppi háve – erenoamážit go oaččut ságastallama sámi nana filbmanissoniid birra gávppi ala. Paneladigaštallama filmma maŋŋá jođiha Karsten Meinich, Montages-filbmamagasiinnas, ja eará digaštallit leat filbmabagadalli Iram Haq, neavttár Marte Magnusdotter Solem ja Lisa Loven Kongslien.

Kurssat ja seminárat

NetSam lágida sámi fágabeivviid ja jahkečoahkkima golggotmánu 23.-24. b. Romssas. Ean dieđe dađi eanet dan birra, muhto jos leat beroštuvvan, stalkes fal sin facebookas.

Geasuhago “Slöjda tilsammans på Vallje”? Mana fal dohko golggotmánu 25. b.!