Runar Myrnes Balto, leder i NSRi inviterer til lávvucamp førstkommende lørdag.

Miellačájeheapmi ja lávvocamp Jovsset Ántii doarjjan ja Nussir-ruvkke vuostá

Hámmárfeasta ja Fálesnuorri vásihit guokte stuora sámi vuoigatvuođaášši 2019:s. Danne bovde Norgga Sámiid Riikkasearvi (NSR) lávvocampii Riehpovuona gáddái gos lágidit ságastallamiid, kultuvrralaš prográmma ja čatnat oktavuođabáttiid. Deaivvadeapmi lea lávvordaga.

– Mearrasámit ja boazodoallu vázzet giehtalaga garra roasuid siste, ja dát lávvocamp leage sámi vuoigatvuođaid váibmosis, sihke áiggi ja báikki dáfus. Mii gávnnadit olggu ovddas ja ságastallat gaskaneamet dáid áššiid birra ja movt mii dáin áššiin sáhttit ovttasbargat boahtteáiggis, lohká NSR jođiheaddji Runar Myrnes Balto.

Lávvordaga prográmmas lea maiddái miellačájeheapmi Jovsset Ántte Sara gárddi luhtte.

– Eiseválddit leat dieđihan ahte fargga áigot bággonjuovvat Jovsset Ántte ealu, vaikko su ášši ain lea ON olmmošvuoigatvuođalávdegotti gieđahallamis. Mii doallat miellačájeheami eiseválddiid badjelgeahččanvuođa ja sámi árbevieruid ja riikkaidgaskasaš olmmošvuoigatvuođaid duolbmama vuostá, lohká Balto.

Campa dollojuvvo dan oktavuođas go NSR doallá konferánssa Skáiddis čakčamánu 13.-15. beivviid, gosa bohtet sáttatolbmot báikkálaš servviin miehtá riikka. Lávvocampii lávvordaga leat maiddái earát bures boahtin, ja prográmmas leat earret ahte mearrasámi gelbbolašvuođaguovddáš Mearrasiidda ja Fálesnuori girječálli Marion Palmera ságastallaba mearrasámi historjjá ja kultuvrra birra, ja mii finadit geahčadeame plánejuvvon ruvkebáikki Gumpenjunis. Camppas mii vuoššat ja suovastuhttit bierggu, ja mii guossohit báikkálaš bohccobierggus ráhkaduvvon borramuša. 

– Campas eai leat dušše fágalaš sisdoallu ja politihkalaš miellačájeheamit, doppe lea maiddái árbevirolaš sámi ovttastallan, ja sámi árbevirolaš borramuš. Buohkat geat beroštit Jovsset Ántte áššis, Nussir-áššis dahje eará sámi áššiin, leat bures boahtin finadit minguin ságastallame ja oahpásmuvvame, hástá NSR-jođiheaddji Runar Myrnes Balto.

 

Campa lea Veaiggosvuonas / Fægfjord diibmu 15.00 - 20.00 – geahča kártta.   


NSR lávvocamp

Miellačájeheapmi Jovsset Ántte ealu bággonjuovvama vuostá lea Jovsset Ántte gárddis lávvordaga dii 14.00 – geahča kártta


Dáppe gávnnat Jovsset Ánte Sara gárddi.