Lea mediaid ovddasvástádus muitalit duohtavuođa

Lea mediaid ovddasvástádus gozihit maid álbmotválljejuvvon politihkkárat dahket ja masa geavahit min vearroruđaid. Seammás lea maid media ovddasvástádus muitalit duohtavuođa dainna lágiin ahte buohkat ipmirdit duohtavuođa.

Dál jurddašan mun ovdamearkka dihte mátkki birra, mas njeallje sámi presideantta ja sin mánát gallededje Hollywooda ja Frozen II máilmmi vuosttaščájáhusa. SÁMi ođasmagasiidna lea olu čállán mátkki birra ja maiddái jearran gii mávssii guhte mátkkálačča mátkki nuppe beallai ábi. 

Ovttaskas ásahusat, Suoma- , Ruoŧa- ja Norgga Sámedikkit ja Sámiráđđi leat máksán iežaset presideantta mátkki. Presideanttat ieža mákse nieiddažiid mátkki. Dan čáliimet ovttain cealkagiin diehtun min lohkiide, amaset olbmot dárbbašit dan imaštallat. Eat mii oaidnán dárbbašlažžan dan birra čállit dađi eanet, justa danne go visot lei dahkkojuvvon njuolggadusaid mielde. Min bajilčála lei baicce illusáhka, go ii leat beaivválaš dáhpáhus ahte Disney dáhttu ovttasbargat sámiiguin, ráhkadit sámegiel filmma ja velá bovdet máilmmi vuosttaščájáhussii. Dat lei min mielas stuora, dehálaš ášši.

iFinnmark baicce oinnii liiban ráhkadit tabloida ášši, mas ášši ovdasiiddus sáhtii ipmirdit ahte Sámediggi lei máksán olles joavkku mátkki Hollywoodii hervvoštallat. Easkka go lohkki deaddilii bajilčállaga ja beassá lohkat ášši, man ovddas ferte vuos máksit jos ii leat diŋgojeaddji, de bođii ovdan rievttes čilgehus, ahte mánáid mátkki ledje váhnemat ieža máksán ja ahte ovttaskas ásahusat ledje máksán iežaset ovddasteddjiid ovddas. Dán iFinnmark ášši birra leamaš garra digaštallan ja iFinnmark redaktevra šiitá ahte dat lea sámiid vašuheaddji artihkal ja ahte sii maiddái gozihit eará ásahusaid ja sin ruhtageavaheami.

Mun sávan goit ahte álbmot lea dál ožžon rievttes dieđuid, go lea oalle vahát jus mediat dieđihit áššiid birra nu, ahte boastut sáhttá ipmirdit. Lea min ovddasvástádus jearrat ja gozihit ruhtageavaheami, muhto lea maid min ovddasvástádus muitalit áššiid nu ahte olbmot eai oačču boasttuipmárdusa.

Dál ii leat go vuorddašit Jikŋon II vuosttaščájáhusa dáppe Sámis. Mii illudit ja sávvat Sámedikkiid geavahit dasa maid veahá ruđa. Dan ávvudeapmái oainnát dáhttut miige searvat, go nu olu mearkkaša dat ahte Sápmi gullo gitta Hollywoodii.

Emneord: