NSR njunušpolitihkkár ja aktivista Beaska . Priváhta govva.

Jođus fáktet bohtet go veagal njuovvat Jovsset Ántte bohccuid

NSR njunušpolitihkkár ja aktivista Beaska Niillas lea jođus Fálesnuorrái. Dáid beivviid gárddástallagohtet oainnát Jovsset Ánte Sara ja Fálá orohat.

–  Dál lean jođus Fálesnuorrái geahččat go Jovsset Ánte ja Fálá orohat gárddástallet. In dieđe bohtet go eiseválddit gárdde lusa. Jus fal dan dahket, de mun juŋgeltelegráfa bokte mobiliseren. Eai galgga ráfis beassat veagal njuovvat su bohccuid, lohká Beaska Niillas.

Nuorta-Finnmárkku diggegoddi celkkii moatti vahku áigi ahte Boazodoallostivrra maŋimuš mearrádus áššis gusto. Jus Jovsset Ánte Sara ieš ii njuova, de sáhttet Eanandoallodirektoráhta ja politiijat boahtit bákkuin njuovvat Sara ealu, vaikko dál dan botta go gárddástallet. Dál gárddástallet 3-4 vahku. Fálás sihke merkot ja njuvvet oktanaga.

– In leat gullan leat go eiseválddit jođus dohko. Mun dušše dieđán, ahte Fálá lea fargga bidjame gárdái ja dasto munge lean jođus dohko, čilge Beaska Niillas.

Jovsset Ánte Sara lea fargga čieža jagi juo dorron Norgga stáhta vuostá Norgga riektevuogádagas. Sara biehttalii njuovvamis ealu 75 heggii, go stáhta gáibidii vuolidit boazologu. Sara vuittii sihke diggegottis ja lágamannerievttis. Alimusriekti fas doarjjui stáda, ja nu Sara guoddalii ášši ON olmmošvuoigatvuođakomiteai. Komitea lea dál meannudeame ášši, muhto Norga ii oainne alddismakkárge geatnegasvuođa vuordit bággonjuovvamiin dassái go ON lea meannudanášši.

– Lea váttis áddet ahte eai áiggo vuordit. Lea maid váttis áddet movt dat áigot čađahit bággodoaimmaid. In dieđe ležžetgo oba jurddašange man olu ja váttes bargu dat šaddá ja lean oalle eahpesihkar bohtet go obanassiige dál, lohká Beaska Niillas,gii lea gearggus mobiliseret jus bohtet.

Liv Berit Hætta, Eanandoallodirektoráhta boazodoalloossodagadirektevra duođaštii mannan SÁMiođasmagasiinnas iežaset pláneme bággodoaimmaid. Hætta dattetge logai ahte eai leat plánen ja mearridan makkárge dáhtona vel. 

Lávvardaga NSR bovde olbmuid doarjut Jovsset Ánte Sara ja seammás čájehit vuostehágu Nussir ruvkedoaimmaide. NSR cegge lávu Fálesnuorrái. Sis lea sierra ákšuvdna prográmma.