Illudat oažžut Hollywood dábiid Sápmái

Boahtte vahku lea Frozen vuosttaščájálmas Hollywoodas ja golbma sámediggepresideantta ja Sámiráđi presideanta dollejit diehttelasat dohko. Walt Disney Animation lea bovden sin dohko.

Frozen-filmma vuosttaš čájeheames besset vásihit muoidduid, glamour, rukses máhtá ja olu beakkálmasaid. Dat šaddá oba stuora vásáhus sidjiide geat vulget dohko.

Buot dáid Hollywood dábiide dieđusge illudit min sámi ovddasteaddjit, muhto sis gal leat eará jurdagat maid mátkkiin. Sii dáhttot dikšut oktavuođa ja čájehit stuora filbmabuvttadeddjiide ahte lea vejolaš ráhkadit eamiálbmogiid birra filmma, nu ahte ii duolmmu ja suolát eamiálbmogiin.

Sii dáhttot čájehit movt Frozen lea ráhkaduvvon. Walt Disney Animation lea Sámedikkiiguin ja Sámiráđiin vuolláičállán ovttasbargošiehtadusa, mii geatnegahttá Walt Disney Animation viežžat rávvagiid sámiin.

Dainna ulbmilin lea somá vel sáddet min sámi ovddasteddjiid nuppe beallái ábi, go sin ulbmil lea oččodit eambbo dákkár ovttasbargguid. Sii dáhttot stuora filmmaid dubbejuvvot sámegillii ja sii dáhttot čájehit eará eamiábmogiidda ja eará buvttadeddjiide ahte lea buoret ovttasbargat ovdalii go váldit.

Mii illudit oaidnit sámi veršuvnna Frozenis ja dieđusge mii maiddái illudit dassái go Sámediggepresideanttat láhčet Hollywood-lágan doaluid Sápmái maŋŋel juovllaid. Maiddái mii dárbbašit oainnat veahá muoidduid, glamour ja ruksesmáhttádoaluid.

Emneord: