Henrik Olsen. Govva: Åse M.P. Pulk/Sámediggi

– Heajumus stáhtabušeahttaárvalus dássážii

Ráđđehusa stáhtabušeahttaárvalus 2020 lea dat heajumus bušeahtta sámi ulbmiliidda maid borgárlaš ráđđehus lea buktán guđa jagis, go geahččá haddejusterema.

Sámediggeráđđi Henrik Olsen lea hirbmosit beahtahallan loguid dihte.

– Dát lea garra reálanjiedjan. Dás ovddasguvlui šaddet bušeahttašiehtadallamat mat bohtet bávččastit, dadjá Olsen.

Sámediggi galgá bušeahttaevttohusa mielde hálddašit sullii 519 milj. ruvnnu jagi 2020. Dás lea 15,8 miljovnna ruvnno lasáhus jagi 2019 ektui. Evttohuvvo lasihit juolludusa 13 milj. ruvnnuin čuovvulit NAČ 2016: 18 Váibmogiella, ruhta galgá geavahuvvot iešguđet doaibmabijuide nannet sámegielaid. Doaibmabijut mat álggahuvvojit, galget čielggaduvvot konsultašuvnnain Sámedikkiin. Dasa lassin evttohuvvo lasihit juolludusa 1 milj. ruvnnuin daidda sámi organisašuvnnaide mat barget givssideami eastademiin.

– Ollislaččat lea 15,8 miljovnna ruvnno lasáhus, dahje 3 proseantta, muhto dáin lea 14 miljovnna ruvnno várrejuvvon. Go váldá eret várrejuvvon ruđa, de báhcá midjiide 0.32 proseanta lasáhus, mii galgá gokčat hadde- ja bálkágoargŋuma. Dat lea garra reálanjiedjan 12 miljovnna ruvnnuin, mii dahká ahte mii dál fertet dahkat duođalaš mearrádusaid. Dát mearkkaša ahte šaddet duohta garra bušeahttašiehtadallamat, dadjá Olsen.

Olsen lohká ahte dát bušeahtta oažžu duođalaš negatiiva váikkuhusaid Sámedikki iežas politihkalaš ja hálddahuslaš doibmii, ja maiddái buot ásahusaide mat leat Sámedikki vuolde.

– Dás leat duođalaš váikkuhusat sámi museaide, sámi giellaguovddážiidda - buot daidda sámi ásahusaide maid mii ruhtadit, lassin Sámedikki doibmii. Lea maiddái garra badjelduolbman Sámedikki iešmearrideamis ja ođđa bušeahttaortnega ulbmilis. Ráđđehus lea dás mearridan gokko mii galgat lasihit, ja guođđá Sámediggái barggu unnidit seamma olu eará sajiin bušeahtas, dadjá Olsen.

Juo ovdal vahkkoloahpa bođii bušeahttasuođđan mii čájeha ahte biddjojuvvo 15 miljovnna ruvnno sámi digitála oahpponeavvuide. Logut otnážis čájehit ahte Váibmogiela čuovvoleapmi vuoruhuvvo. Sámediggi lea nu ožžon ipmárdusa dáidda bušeahttadárbbuide.

– Dát lasáhusat leat buorit, muhto duohta dilis čájeha dát bušeahtta duohta unnideami sámi doaimmain, dadjá sámediggeráđđi Henrik Olsen.