Guldalii váimmu ja ráhkadii filmma bearraša morrašis

Go Máret Inger Anti galggai filmma ráhkadit journalistaoahpus, de guldalii váimmus. Busselihkohisvuohta masá 20 jagi áigi, Kárášjogas, lea agibeaivái darvánan su ja bearraša muitui. Filbmadahkki, su oappát ja viellja ledje mielde skuvlabusses, mii jávkkihii badjel luotta ja fierai johkii. Okta oappážiin ii joatkán eallima bálgá lihkohisvuođa maŋŋá.