Kautokeino Rein buvtta “Duottargolli” lea mielde loahppagilvvus kategoriijas «Dán jagáš biergu». Govas eaiggátguovttos Per Anders ja Anna Kristine. Priváhta govva

Goikebiergguin stuorra loahpagilvui

Mannan čavčča vuoruhii Guovdageainnu fitnodat «Kautokeino Rein» ođđa designa ja ođđa buktaga man leat gastašan “goike duottargollin”. Jo dán jagi sáhttet sii vuoitit «Det Norske Måltid» loahppagilvvus iežas buktagiin.

Kautokeino Rein lea buktagiinnis mielde kategoriijas «Årets kjøtt - foredlet», mii lea reidejuvvon biergu. Maid jurddašalat vejolašvuođain olahit gitta bajimužžan?

– Šaddá hui gelddolaš oaidnit. Mun navddán ahte mis lea buorre vejolašvuohta, dadjá fitnodaga eaiggát Per Anders Bongo.

Maid dát mearkkaša didjiide?

– Dat livčče somá vuoitit, namuheapmi mearkkaša hui ollu min fitnodahkii. Mii sávvat ahte eambbosat háliidit smáhket min buktaga ja ahte media fuomášupmi addá eambo beaggima min buktagii.

Goikebiergu ii leat profilerejuvvon nu ollu, mii lea rievdan?

– Dasa ii leamaš nu ollu fuomášupmi, muhto Márkanlávdegoddi lea áŋgiruššan ja Finmmark Rein lea márkanfievrridan bohccobierggu, nu ahte lea stuorra gávpejearru bohcobirgui dál.

Røros Rein fitnodat lea maiddái mielde «Det Norske Måltid» loahppagilvvus.

– Dat lea hui somá ahte bohccobiergu lea mielde dákkár gilvvuin, gos Røros Rein lea mielde kategoriijas «Dán jagáš biergu».

Bohccobiergu lea šaddan “gourmet-biepmun”.

– Dan gal lea. Mus leat oastit máddin eret, sihke priváhta ja maiddái stuorra gávpedásis, Oslos ja Østlánddas ja Vestlánddas. Goikebierggu lea álki sáddet, jiekŋabiergu dolvojuvvo Tromsii ja Finnmárkui.

Lehket go mearkkašan maidige maŋŋel go čielggai ahte lehket mielde loahppagilvui?

– Ahte mii háliidit stuoridit vuovdima ja mii leat fuobmán váikkuhusa leat mielde dákkár gilvvus. Dan fuobmát mii Stavangeris, gos eambbosat leat beroštuvvan buktagis. Nu ahte dat lea hui buorre, loahpaha Per Anders Bongo.

Dáppe sáhtát geahččat oasálastiid geat leat mielde «Det Norske Måltid» loahppagilvvus.