Go čalmmustahttit giela, de eambbosat dáhttot sámástišgoahtit

Go leahkastat sosiálamediaid de ihtet govat gávttehasain. Sii leat iešguđetge sajiin, muhto sin oktasaš mihttomearri dán vahku lea čalmmustahttit sámegielaid. Dán jagi lea ON eamiálbmogiid giellajahki ja Sámediggi ásahii dan oktavuođas áibbas sierra sámi giellavahku.

Álttás oahpahit dárogielhálliide árgabeaivvi sániid sámegillii. Dan dahket plakáhtaiguin, maid leat darvehan miehtá Álttá. Oslos vearroetáhta almmuhii ahte dás rájes sáhttá álbmotregistaris almmuhit giellamáhtu. Kárášjogas lea Gonagas Harald leamaš veahkkin čalmmustahttime giellavahku. 

Obanassiige leat gielladoalut leamaš miehtá Sámi.Ovdal lei heahpat ja váivi leat sápmelaš. Mii dáruiduvaimet ja máŋggas masse sihke kultuvrra ja vejolašvuođa oahppat sámegiela. Ođđasat áiggis ja dál go Sámediggi, sámi ásahusat, suohkanat, searvvit ja fitnodagat ovddidit sámevuođa de sámevuohta šaddá normálan. Sámevuohta lea šaddan somá, miellagiddevažžan ja odne mii čevllohallat iežamet duogážiin. 

Mii čállit dán SÁMi ođasmagasiinna nummiris máttasámi neavttára Marja Lisa Thomassona birra. Son sámásta njuovžilit lávddis, go earát leat čállán su mánusa ja bagadit su gielalaččat. Son lea álo gullan sámegiela ja ipmirda giela eambbo go maid máhttá hállat. Dál ollesolmmožin dáhttu buorebut oahppat gielas. Mii maiddái čállit duiskalaš Bettina Dauch birra dán magasiinnas. Su mielas lei giella ja kultuvra nu erenoamáš ahte dáhtui oahppat giela. Lean iešge vásihan moadde buiga dáčča ja eurohpalačča, geat nu liikostedje Sápmái ahte dáhtto giela oahppat. Dakkár muitalusat liggejit váimmu. Lea nu somá ja nu dehálaš, go olbmuin lea dáhttu oahppat sámegiela.

Sámediggi orru bures lihkkostuvvan sihke ON eamiálbmogiid giellajagiin ja giellavahku čalmmustahttimiin. Erenoamáš somá lea gullat ahte presideanta Aili Keskitalo áinnas áiggošii giellavahku juohke jagi. Jáhkán min dárbbašit dan. Mađi eambbosat sosiálamediain muitaladdat gielladáhpáhusain, dađi eambbosat dáhttot searvat gielladoaimmaide. Dat lea buorre muittuhus ahte fertet giela seailluhit ja ovdánahttit. Ja mađi eambbo mii oainnusin dahkat giela, dađi eambbosat dáhttot oahppat dan, justa nugo go Marja Lisa ja Bettina. 

Emneord: