Illustrašuvdna govva.

Girječállioahpu boahtteáigi

Čális Fal 2-girječállioahpu oahppit: Risten Biret Elle Eira, Ánne Márjá Guttorm Graven, Iŋgá Elin Marakatt, Anne Olli, Marianne Siri, Marianne Solbakken ja Sara Kristine Vuolab

Sámi Girjjálašvuođabeivviin loahpahuvvui Čális Fal 2 -girječállioahppu. Mii leat čađahan dán oahpu ja dá leat min jurdagat maŋŋá oahpu:

Čális Fal lea mearehis dehálaš prošeakta, mii duođaid ferte seailluhuvvot ja ovdánahttot. Mis leat unnán girječállit ja ođđa girjjit sámegillii, ja girječállioahppu lea čoavddus dasa. Ieš fágalaš bealli lea leamaš hirbmat buorre, mii leat ollu oahppan ja mis leat leamaš hui buorit logaldallit ja fágalaš jođiheddjiin oahpus lea leamaš alla dássi, namalassii Sigbjørn Skådenis ja Inga Ravna Eiras. 

Girječállioahppu lea maid dakkár oahppu mii gáibida ahte ohppiide addo ollu áigi bargat deaivvademiid gaskka, ja nu lea ge hui vuogas nu mo dál lea; oahppu bistá guokte jagi ja leat oktiibuot 8 deaivvadeami. Mii geat leat ohcan dán ohppui ja čađahan dan, mii leat várren iežamet áiggi deaivvademiide ja čállimii gaskkal deaivvademiid. Čális Fal prošeakta lihkostuvvá, vuosttaš oahppijoavkkus leat jo riegádan girječállit, ja maiddá min joavkkus leat oahppit geain leat girjjit jo boađi boađi. Ja mis lea duohta dáhttu joatkit čállimiin maid.

Oahppu ánssáša albma hálddašeami. Dálá organiseren ii leat buoremus vuohki min mielas. Dál Sámi Dáiddárráđđi organisere oahpu, muhto orru nu ahte sis ii leat dat kapasitehta, mii dárbbašuvvo jođihit dákkár oahpu. Nu ahte vaikke oppalaččat leat duhtavaččat oahpuin, de leat goitge vásáhusat oahpu čađaheamis dan mađe negatiivvalaččat ahte oaivvildat ferte gávdnat buoret organiserema. Erenoamáš váidalahtti lea ahte proseassa antologiijain, mii galggai almmuhuvvot golggotmánu 2. beaivve, ii leat čađahuvvon nu mo midjiide lei muitaluvvon, ja nu mo plánain čuoččui. Girjji plánen ja almmuheapmi lea dehálaš oassi girječállimis, ja dan mii eat leat beassan oahppat. Lea leamaš váttis fidnet hálddahusa ságaide, muhtomin veadjemeahttun. Lea leamaš ollu eahpesihkkarvuohta ja eat diehtán ovdal beaivvi ovdal ahte min antologiija ii almmuhuvvo Sámi Girjjálašvuođabeivviin. Dat lea duođaid váidalahtti. 

Buorit ođđasat goitge ledje go muitaluvvui midjiide ahte Sámi Allaskuvla lea positiiva váldit badjelasas oahpu. Muhto daid dieđuid vuođul maid mii leat gullan, de ii sáhte Sámi Allaskuvla dahkat dan ovdal áramusat guovtti jagi geahčen. Guokte jagi lea menddo guhká vuordit, ođđa oahppu ferte boahtit johtui farggamusat. Ja dan oahpus ferte leat doaibmi hálddahus. Ráhkis Sámi Allaskuvla, sámi servodat dárbbaša ahte dii váldibehtet ovddasvástádusa. Mii sávvat ahte Sámediggi, Sámi Girječálliidsearvi, Sámi Dáiddárráđđi, Sámi Allaskuvla dahje eará ásahus sáhttá váldit ovddasvástádusa ja čoahkkanit farggamusat gávdnat čovdosa dása. Mii háliidat ahte eambbosat galget beassat vásihit dán buori oahpu ja ahte šaddet ain eanet sámegielat girječállit.