Sámediggeráđi Henrik Olsen lohká erenoamáš lossat leamaš bargat bušeahtain. GOVVA: Roger Østby/Sámediggi

- Earenoamáš lossa bušeahttabargu

Sámediggeráđđi lea ráhkadan 2020 bušeahttaevttohusa. Sámediggeráđi Henrik Olsen lea beahtahallan go sis lea leamaš mandáhtta dušše čuohppat bušeahta.

– Dán jagi lea ráđđehus mearridan gokko galgá lasihuvvot, Sámediggi lea beassan dušše mearridit gokko sámi servodagas čuohppat galgá. Bušeahttabargu lea leamaš earenomáš lossat danne go bušeahta duohta rámma lea ollu unnon. Dađi bahábut eat nagot 2020 bušeahtas gávdnat ruđaid ollu buriid initiatiivvaide ja áigumušaide maid doarjut galggašii, earenoamážit kultursuorggis, danne go bušeahtta duohta rámma lea unnon 12 miljovnna ruvnnuin, dadjá sámediggeráđi Henrik Olsen preassadieđáhusas.

Giela vuoruhit

Ráđđehusa lasáhusat Sámediggái stáhtabušeahttaevttohusas leat merkejuvvon ruđat gos ruhtageavaheapmi galgá departemeanttain konsulterejuvvot.  Sámediggi lea ožžon 13 miljovnna ruvnno Váibmogiela čuovvoleapmái ja 1 miljovnna ruvnno Sámedikki bargui givssideami vuostá. Daid doaibmabijuid áigu Sámediggi vuoruhit dán jagi bušeahtas. 

– Sámediggeráđđi čuovvula ráđđehusa merkejuvvon ruđaid sámegielaid nannemii. Mii bidjat 13 miljovnna ruvnnu Giellaloktema čuovvuleapmái, ja dat mearkkaša ahte giellabargu šaddá nannejuvvot máŋgga suorggis, dadjá Olsen.

Unnit lasáhus go ráđđehusas

Sámediggi oažžu evttohuvvon 2020 stáhtabušeahtas 0,3 proseantta bálkálasáhusa. Muđui lea bušeahtas 3 proseantta lasáhus. Sámediggi juolluda guokte goalmmátoasi bušeahtas doarjjan sámi ásahusaide, sámi servodahkii ja sámi guovlluid álbmogii. Dat oassi stáhtabušeahtas ii lea hatti dáfus justerejuvvon. Sámi servodahkii dat buktá stuorra váikkuhusaid go sámi ásahusat nugo sámi mánáidgárddit, giellaguovddážat, sámi museat ja táhterat eai beasa bisuhit otná doaimma, muhto fertejit baicce geahpedit doaimmaset. 

– Rámma maid leat ráđđehusas ožžon, 12 miljovnna duohta vuoládusain, lea dahkan dán jagi bušeahttabarggu hástaleaddjin. 0,6 proseanta bálkálasáhus maid evttohit Sámedikki politihkalaš ja hálddahuslaš doibmii ja buot min fásta doarjjavuostáiváldiide, mearkkaša unnit lasáhusa buohkaide earret go dat bálká- ja haddelassáneapmi mii 2020:s vurdojuvvo. Dat máksá ahte gaska sámi servodaga ja dáža servodaga gaskka stuorru eanaš surggiin, sámi servodahkii vahágin, dadjá Olsen. 

Sámediggeráđđi čuovvula dievasčoahkkima girjjálašvuođagieđahallama earret eará sámi girjjálašvuođabuvttadeami nannemiin 5,1 miljovnna ruvnnuin ja girjjálašvuođagaskkustanvirggiid ásahemiin mátta- ja julevsámi guovlluide, ja Olsen lea ilus go vihtta girjebusse jotkojuvvojit ain Sámedikki doarjagiin. 

Sámedikki 2020 bušeahtta mearriduvvo juovlamánu dievasčoahkkimis.