Norgga eanandoalloministtar Olaug Bollestad ii dáhto šat addit jearahallama Jovsset Ánte Sara áššis. GOVVA: KÁB preassagovva

Eanandoallodepartemeanta jávoheapme

Sihke ON olmmošvuoigatvuođakomitea ja Eamiálbmogiid bistevaš forum cakkadit Norgga bággodoaimmaid čađaheames. Eanandoallodepartemeanta ii siđa šat addit jearahallama Jovsset Ánte Sara áššis. 

– Ášši lea dál loahpa geahčen ja Eanandoallodirektoráhtas lea ovddasvástádus proseassa čuovvulit, čállá Eanandoallodepartemeantta gulahallanossodat e-poasttas SÁMi ođasmagasiidnii.

Vigget ON jorgalahttit

SÁMi ođasmagasiidna diehtá ahte ráđđehusadvokáhtta lea bargame ON olmmošvuoigatvuođakomitea ávžžuhusain. SÁMi ođasmagasiidna dieđuid mielde ráđđehusadvokáhtta vikkaha oažžut ON geassit ruovttoluotta ávžžuhusa vuordit bággodoaimmaiguin dassái go komitea lea árvvoštallan ášši. Son galgá leat sádden čállosa ON:i ja bivdán ON geassit ruovttoluotta ávžžuhusa. Departemeanta ii hálit vástidit goas ráđđehus geargá meannudeames ON ávžžuhusa ja dáhttot go čuovvulit ávžžuhusa. 

– Min politihkalaš jođiheapmi lea juo máŋgga oktavuođas kommenteren ášši. Šattašii moivi, jus departemeanta dál vástida oasážiid birra stuora ja váttes áššemeannudeamis, mii dál lea loahpa guvlui manname, čállet gulahallanossodagas.

Sosialisttalaš Gurutbellodat moaitá ráđđehusa nollámin.

Badjelgehčče Bistevaš foruma 

Maiddái Eamiálbmogiid bistevaš forum lea bargan dan ovdii ahte Norga vuorddášii. Ovdal juovllaid sáddii Eamiálbmogiid bistevaš forum ávžžuhusa Norgga ráđđehussii, mas ávžžuhedje vuordit baggodoaimmaiguin.

– Dán ávžžuhussii eat leat ožžon vástádusa ge, lohká Eamiálbmogiid bistevaš foruma ságajođiheaddji Anne Nuorgam.

Nuorgam muitala ahte sii ain barget Jovsset Ánte Sara áššiin. Aiddo maid forum lea bargame ášši ovdii ii sáhte Nuorgam vel muitalit. Nuorgam vuordá Norgga čuovvulit ON ávžžuhusa go Norga lea geatnegahtton čuovvut konvenšuvnnaid, maid lea ratifiseren.

– Juos Norga ii čuovvul ON olmmošvuoigatvuođakomitea čovdosa, de dalle Norga lea heajudeamen olmmošvuoigatvuođaid orgána sajádaga ja seammás duššindahká mearrádusa, maid komitea lea vihkkedallamin, lohká Nuorgam.