Ingá Márjá Steinfjell. Govven: Priváhta govva

- Eallin lea buorre go diibmu ii mearrit maidege

GEASSESÁGASTALLAN

Namma: Inga Marja Steinfjell

Ahki: 38 jagi

Eret/orru: Guovdageainnus

Virgi: Sámi arkiivva direktevra

Maid lávet geasset bargat?

Eallin lea nu rievdan ahte in dieđe šat maid «láven». Illudan ođđa geassedábiid ásahit. Dál láven mánáin stoahkat olgun ja su čalmmiiguin fuobmát máilmmi. 

Maid don lávet muđui bargat?

Lean leamaš studeanta máŋga jagi. Lean njamahan, čállán, čohkkán ja čirron. Riegádahttin ja masterčállin lea lossa kombinašuvdna, man in ávžžut jus eai leat hui buorit veahkit! Dál návddašan iežan joavkku ja ráhkkanan álgit ođđa bargui.

Leat go makkárge erenomáš plánat dán geassái?

Áiggošin olles joavkkuin mannat meahcis. Galggašin maid lubmet konfirmašuvnnaide. Muđui finadan vuohčán olgoriikkas sihke joavkkuin ja buriid ustibiiguin ovdal. Nu illudan!

Buoremus geassemuitu?

Njuiket stuora johkii maŋŋel ija mearkuma ja de nohkkat. Oaivvi dievva ruovgasat, biellut ja gazzaskillamat. Eallin lea buorre go diibmu ii mearrit maidege. Muđui láven muittohallat dan vahkku go oahpahallen kajáhkain meallut. Mearas lei +24 gráda ja kajáhkken lei justte nu miela mielde go ledjen govahallan.

Buoremus geassetipsa?

Vaikko man ahkidis dálki leažžá, ale viesus goit oro. Vuollan oastit čuoikašuoji. Čohkke somás olbmuid ja daga dola. Muđui ávžžuhan finadit olggobeale “komfortsona”!

Mii lea du favorihttabivttas geasset?

Dán geasi? Arvebiktasat. Muđui shortsat ja oanehisbáidi. Rabasjulggiid.

Jus fertet válljet ovtta diŋgga man haga it birge geasset, mii dat lea?

Mu biila. Ja čuoikasuodji.

Joatkke cealkaga: Geassi munnje lea …

… oalle bihttábordin, duhtadit bearraša dárbbuid ja mielaid. Etniin lea garra bargu!