Disney sáddii preassadieđáhusa sámegillii

Go Disney almmuhii geat nektet Jikŋon 2 filmmas ja goas filbma almmuhuvvo, de Disney  čálii preassadieđáhusa sámegillii. Sámediggepresideanta Aili Keskitalo illuda.

– Gii lei dan jáhkit jagi áiggi??!! Mu mielas addá buori dovddu go válljejit gulahallat minguin min gillii. Dat lea buorre ovdamearka eará fitnodagaide. Go Disney máhttá ja dáhttu, de lea vejolaš earáide maid. Leat giellajagi gudnejahttán, čállá Norgga sámediggepresideanta Aili Keskitalo dieđus SÁMi Ođasmagasiidnii.

Visot čállun sámegillii

Preassadieđáhusas čállá Disney sámegillii ahte Frozen 2 lea vuosttaš kinos almmuhuvvon animašuvdnafilbma mii goassege lea dubbejuvvon davvisámegillii. Dasto muitala Disney ahte Jikŋon 2 lea filmma sámegiel namma, ja almmuhanbeaivi lea juovlamánu 25. beaivvi.

Preassadieđáhusa leat čállán maiddái danne go dál almmuhit sin geat nektet sámegielat filmmas. 

– Geahččit besset gullat olu čeahpes sámegielat taleanttaid dain dovddus ja oahpes rollain maid mii buohkat dovdat Frozen-filmma rájes, čállá Disney gii maiddái lea háleštan váldoneavttárin Marianne Penthain. 

Sámi beakkálmasat Jikŋon 2 filmmas

“Lea hirbmat stuora gudni munnje go lean ožžon Elsa-rolla. Mun lean váldán barggu hui duođalaččat ja vuollegašvuođain, ja lean mearihis rámis leat oassin sámi Jikŋon 2-filmma neavttárveagas,” dadjá Marianne Pentha, gii neavttaša Elsa sámegiel filbmaveršuvnnas.

Eará namaid gean Disney Animation dál almmuha leat: 

Anna - Elin Kristina Oskal, Olaf - Anders Rimpi, Kristoff - Vegard Bjørsmo, 

Jelena - Mari Boine, Dronnet Iduna - Eva Jeanette Iversen, 

Leutnánta Mattias - Mikkel Gaup, Ánne-Máret (Honeymarin) - Ánne Mággá Wigelius,

Nuorra Elsa - Neda Margrethe Labba, Nuorra Anna - Ella Márge P. Nutti

Miehtá filmma, sihke originála ja dubbejuvvon veršuvnnain, gulat Aurora, Jietna nammasaš rollas.

Disney animation maid almmuha ahte bagadalli lea Sara Margrethe Oskal. Jorgaleaddji lea Berit Margrethe Oskal. 

ja ahte lyrihkalaš jorgaleaddjit leat Ailu Valle, Sara Margrethe Oskal ja Cathrine Bang Norum.

– Filmma sámegiel veršuvdna lea Sámi Parlamentáralaš Ráđi (SPR) ja Sámiráđi ja Walt Disney Animation Studios ovttasbarggu boađus, mas Jikŋon 2 filbmadahkkit leat ráđđádallan sámi verddejoavkkuin áššiid dáfus filmmas maidda leat ožžon inspirašuvnna iežaset mátkkis Sámis, loahpaha Disney Animation sámegillii ja almmuha vel oktavuođadieđuid sámegillii. 


Dá lea preassadiehtu man Disney animation sáddii media ásahusaide.