Sámediggeráđđi Henrik Olsen. Sámedikki Preassagovva: Åse M. P. Pulk

Davviálbmogiid guovddáš oažžu doarjaga ovddidanprošektii

Sámediggeráđđi juolluda 150 000 ru doarjjan Davvi álbmogiid guovddážii Gáivuonas ovdaprošektii man áigumuššan lea čielggadit viiddideami mas Áillohačča/Nils-Aslak Valkeapää barggut leat vuođđun.

Davvi álbmogiid guovddáš lea árjjalaš sámi kulturviessu ja álgoálbmotguovddáš mas lea museaossodat. Guovddážis lea ovdaprošeakta ovttas Vuođđudusain Lásságámmi, mii hálddaša Áillohačča vuoigŋadujiid vuoigatvuođaid.

Ovdaprošeavttas áigot čielggadit livččii go guovddážis vejolašvuohta oažžut fásta čájáhusa ja magasiinna Vuođđudussii Lásságámmi. Čájáhussii galget gullat buot Valkeapää dáiddalaš buvttadeamit nu ahte čohkkejuvvo muitalus stuorra ja mearkkašahtti sámi dáiddára birra. Čájáhusa sisdollui gullet danne jienat, govat, girjjálašvuohta, musihkka ja filmmat, mat gáibidit digitála čovdosiid.

Sámediggeráđđi Henrik Olsen dadjá ahte dát prošeakta ovddidivččii goappašiid ásahusaid, seammás go addá vejolašvuođa olámuddui buktit ja gaskkustit Áillohačča dáidaga.

– Dasa lassin lea dat deaŧalaš lávki Áillohačča dujiid suodjaleames boahtteáigái. Áŋgiruššama arkiivva/magasiinna sadjái oažžumis ferte maiddái sáhttit geahččat Bååstede-prošeavtta oktavuođas ja museaid gáibádusaid ollašuhttimis go jurddašit dávviriid vurkkodeami, dadjá Olsen preassadieđáhusastis.

Prošeavttas lea dasa lassin guhkes áiggi mihttomearri dan ektui ahte sáhttit fállat dáiddáriidda geat hospiterejit Lásságámmis vejolašvuođa maiddái čájehit sin dáidaga gaskaboddosaš čájáhusain Davvi álbmogiid guovddáža lokálain.

– Sámi dáidaga ja kultuvrra ođđa gaskkustanarenat leat deaŧalaččat, erenoamážit dáiddáriidda geat vuos eai leat sajáiduvvan. Dán lágan fálaldat sáhtášii leat mielde loktemin ovdan eanet sámi dáiddáriid ollu šáŋŋeriin, dadjá Olsen.

Doarjja addojuvvo doarjjaortnegis Ásahusovddideapmi.