Ánne Márjá Guttorm Graven. Priváhta govva

-Dán jagi lean vuosttaš háve váldán albma luomu

GEASSESÁGASTALLAN

Namma: Ánne Márjá Guttorm Graven

Ahki: 37 jagi

Eret/ orru: Lean Kárášjogas eret ja orun Lodegis.

Virgi: Barggan jorgaleaddjin, ja muđui barggan gielladoaimmaid.

Maid lávet geasset bargat?

Juohke geasi finan Riddu Riđus, ja jus heive de finan vel Márkomeanus mánáiguin. Murjen go muorjjit láddet ja manan sáttogáddái go leat báhkat.

Maid lávet muđui bargat?

Na, muđui mus leat dábálaš árgabeaivvit, dálu doalan ja nu ain. Lean iežan unna bearrašiin, deattán telefovnna menddo ollu, barggan go lea liiba ja jugan ollu káfe.

Leat go makkárge erenomáš plánat dán jagi?

Dán jagi lea vuosttaš háve mun lean váldán albma luomu, ballen veahá ovddal gihtii mo dat galggai mannat, muhto lean bures nagodan vuoiŋŋastit. Mis leat leamaš geasseguossit, ja plánen vuolgit mánnávuođa bálgáid guorrat borgemánu álggus.

Vállje ovtta diŋgga man haga it birge geasset.

Beaivevuoiddas mas lea faktor 30, mus lea hui hearkkes liiki.

Buoremus geassemuitu?

Mu mielas lea váttis válljet ovtta geassemuittu. Muhto mus leat hui buorit muittut daid gesiin mat mus ledje mánnán: láviimet Johkamohkkái vuodjit, doppe láviimet basseaŋŋas vuojadit, oahpásmuvvat eará mánáiguin, guhká gohcit ja snjiezistit tealttás ovdal nohkaimet. Mis lávii hui somá!

Favorihttabivttas geasset?

Geassečuvla. Vaikke ii leat áibbas duohta de láven lohkat mus leat eanet geassečuvllat go Sámis leat geassebeaivvit jagis.

Buoremus geassetipsa?

Boradit olgoáimmus álo go lea vejolaš, go liehmuda de borragoađán iđitborramuša veránda alde.

Joatkke cealkaga: Geassi munnje lea…

… čuoikkaide borrot, skihpáriiguin deaivvadit festiválas, geasseguossit, gálašit, leat olgun fiertun ja buriin oamedovdduin girjjiid logadit siste arvin.