Guovddášbellodaga jođiheaddji Trygve Vedum irggástallan sámi gielddain lea váikkuhan. Son ja su bellodat leat dáid válggaid vuoitit, go Guovddášbellodat lei dat bellodat, mii birgii buoremusat, go buohtastahttá ovddit válggain.

Dál ohcagohtet ovttasbargoguimmiid

Eanaš sámi gielddain ja eará guovlluin Norggas maid lea Guovddášbellodat šaddan bivnnuhin. Sámi gielddain leat šiehtadallamat juo olles leahtuin jođus ja máŋgga gielddas jáhkket Guovddášbellodaga beassat eanetlohkui ja sin evttohas sátnejođiheaddjin. 

Guovddášbellodat leat dáid válggaid vuoitit, go Guovddášbellodat lei dat bellodat, mii birgii buoremusat, go buohtastahttá ovddit válggain. 


Válgabohtosiid neahttastiiddus valgresultater.no čájeha válgabohtosiid. Olles Norggas lea Guovddášbellodat dat mii birgii buoremusat, go buohtastahttá ovddit válggain. GOVVA: valgresultater.no

Deanus oaččui Bargiidbellodat eanemusat jienaid, muhto Guovddášbellodat lei bivnnuheamos dan ektui, man ollugat dan jienastedje ovddit válggaid ektui. Guovddášbellodagas leat dál njeallje áirasa gielddastivrras, guokte eanet go diibmá. Bargiidbellodat ges lea massán ovtta ja soaitá massit vel nuppi. Aiddo dál leat sis gávcci suohkanstivraáirasa.

Guovddášbellodaga Jon Erland Balto veadjá fasket alcces sátnejođiheaddjeviđjjiid, mat dássážii leamaš Bargiidbellodagas. Son lea olles leahtuin šiehtadallame.

– Deanus mii ovdánat go mis lea buorit politihkalaš áššit, buorit kandidáhtat ja olu ealáhusolbmot listtas. Šiehtadallamat leat áibbas álggus, muhto listtut leat hui ovtta oaivilis politihkas. Mihttomearri lea beassat posišuvdnii ja maiddái sátnejođiheaddjin, lohká Guovddášbellodaga Jon Erland Balto.

Bargiidbellodaga sátnejođiheaddjievttohas ii loga nu sákka ballat Guovddášbellodagas.

– Ii lsáhte goassege láibbas sihkar, muhto in bala gal hirbmasit ahte Guovddášbellodat rivve sátnejođiheaddjeviđjjiid Bargiidbellodagas. Mii leat ságastallame Deanu Sámelisttuin ja Sosialisttalaš Gurutbellodagain ja lea stuora doaivva gávdnat oktasaš politihkalaš vuođu ja movt juogadit politihkalaš ámmáhiid, lohká Bargiidbellodaga sátnejođiheaddjievttohas Helga Pedersen. 

Buot ain vejolaš

Maiddái Guovdageainnus oaččui Guovddášbellodat eanet jienaid go ovddit válggain. Golmmas besset suohkanstivrii ja nu lea sis stuora vejolašvuohta váikkuhit suohkana boahtteáiggi. Mannan suohkanstivrras ii lean Guovddášbellodat oba suohkanstivrras ge. Bargiidbellodat massii 3 áirasa ja nu Bargiidbellodagas eai leat go guokte áirasa suohkanstivrras 

– Dál álgá bargu oččodit buriid ovttasbargoguimmiid, vai Guovddášbellodat beassá eanetlohkui, lohká Guovddášbellodaga Hans Ole Eira. 

Dattege lea ain olu eahpečielggas Guovdageainnus. Dáloniid lista, mas leat vihtta áirasa suohkanstivrras ja nu eanemus áirasat, sáhttá beaivvi mielde oažžut guđát áirasa vel suohkanstivrii. Sáhttá oainnát leat nu ahte Johtti Sámi Lista massá ovtta áirasa Dáloniid Listui. Jus nu geavvá, de lea oalle sihkar ahte Dáloniid listtus ožžot sátnejođiheaddjesaji. 

Dáloniidlisttu sátnejođiheaddjievttohas, Hans Isak Olsen, lea gearggus stivregoahtit boahtte njeallje jagi.

Vurdet gealdagasas

Kárášjogas lea maiddái oalle eahpečielggas gii šaddá sátnejođiheaddjin. Olles maŋŋebárgga eahkeda rievddadedje bellodagaid áirraslogut. Olgešbellodat massii iežas áidna áirasa Guovddášbellodahkii, ovdalgo beasai fas gielddastivrii persovnnalaš jienaid dihte. Olgešbellodat rivvii dasto Kárášjoht`Listtas ovtta áirrassaji. Dasto lea čielgan ahte Bargiidbellodagas leat čieža áirasa gielddastivrras, Guovddášbellodagas guhta áirasa,  Kárášjoht`Listtas guokte áirasa ja Sámeálbmot Bellodagas ges guokte áirasa. Johttisáme Listtus lea okta áirras gielddastivrras. Dál leat sihke Guovddášbellodagas ja Bargiidbellodagas gealdagasas goappá dáhttu Sámeálbmot Bellodat doarjut. 

– Leat oalle gealdagasas dál ja vuorddašat vel maŋimuš jienaid. Bargiidbellodat ain juo lea dahkan seamma buriid válggaid go ovddit áigodagas. Lean gearggus joatkit sátnejođiheaddjin, muhto dan ii dieđe ovdalgo konstituerenčoahkkimiin leat geargan. In leat vel háleštan geainnage, muhto mis lea leamaš issoras buorre ovttasbargu Johttisámi listtain ja Sámeálbmot bellodagain. Lea doaivva ahte joatkit ovttasbargguin, lohká son. 

SÁMi Ođasmagasiidna ii leat fidnen ságaide Sámeálbmot Bellodaga John Nystad.

Dáppe oainnát visot bohtosii: valgresultater.no

 

 

Emneord: