Jovsset Ánte Sara lea dál gárddástallames. Justa ovdalaš go eiseválddit galge bákkus njuovvat su bohccuid, de gávnnai Sara gaskaboddosaš čovdosa. Dál skeŋke son bohccuid eará boazoeaiggádii eará orohagas. Dát čoavddus dattege lea dušše gaskaboddosaš. Govven: Inger Marita Bals

Bággehallan addit eret ealus 

Jovsset Ánte Sara addá bákku vuolde eret ealus. Eanandoallodirektoráhtta gohčoda dan iešstivrejupmin ja rámida boazodolliid go soabadit. – Dát lea gaskaboddosaš heahtečoavddus, fal eiseválddit eai gotte mu bohccuid. 

Nu lohká Jovsset Ánte Sara gii dál lea Fálesnuoris mearkungárddis. 

Duođaštit Eanandoallodirektoráhtas

Guovvamánu 20. beaivvi celkkii Norgga Boazodoallostivra maŋimuš geardde ahte Jovsset Ánte Sara ferte geahpedit boazologu 75 heggii. Jus ieš ii daga dan, de eiseváldi ovttas politiijain, boazopolitiijain, fylkkamánnin ja biepmobearráigeahčuin bohtet veagalit njuovvat. Mearrádusa doarjjui velá Nuorta-Finnmárkku diggegoddi gieskat. 

– Mii čuovvut mearrádusa mii lea dahkkon boazodoallostivrras ja leat pláneme fylkkamánniin ja biebmobearráigeahčuin. Mii eat leat mearridan dáhtona goas doaimmat galget čađahuvvot, logai Eanandoallodirektoráhta boazodoalloossodaga direktevra Liv Berit Hætta gieskat SÁMi ođasmagasiidnii.

Dál duođašta Eanandoallodirektoráhta ahte gaskaboddosaš čovdosa leat dohkkehan. 

Klipse ja skeŋke ealu

Dan botta go Fálá orohagas gárddástallet, de Jovsset Ánte Sara klipsevisot bohccuid earet dan 75 heakka man beassá bisuhit Fálá orohagas. Buot klipsejuvvoibohccuid son addá eret soapmásii gii lea áibbas eará orohagas. 

Nu Jovsset Ante bohccot leat dál báhtareaddjit. 

– Die lei áidna čoavddus dál ammes mu fallehit ja vealggáiduhttit miljovnna njuovvangoluiguin seammás go rievidit mus sihke ealu ja birgejumi. Dál lea bohccuin “asyla” cuoŋománo 1. beaivái.Movt dan maŋŋel šaddá, in dieđe, lohká son.

Jovsset Ánte lea guoddalan Nuorta-finnmárku diggegotti duomu mii doarjjui bággonjuovvama, muhto stáda ii leat váldán vuhtii guoddaleami ja dáhtui čovdosa vaikko ášši lea guoddaluvvon. Stáhta iige dáhttun ON gohččomuša vuordit. 

Dássážii leat Saras 580 000 ruvnnu ovddas beaivesáhkut, ja stáda lei ráhkkanahttán baggonjuovvát Sara bohccuid dasttán go Fálá eallu čoahkkana. Gaskaboddosaš čovdosiin, mii dagaha ahte eisseválddit eai boađe bákkus njuovvat ealu dál, garvá Jovsset Ánte Sara máŋga miljovnna ruvdnosaš rehkega. Stáda njuovvangoluid livččii oainnát Sara ieš šaddan gokčat. 

SÁMiOđasmagasiidna diehtá Sara gárttai garra šiehtadallamiid čađahit go stáhta  vikkahii Jovsset Ánte Sara geassit áššis ON:s. Dasa ii miehtan Sara ja nu lea ášši ain meannudeames ON Olmmošvuoigatvuođa komiteas. 

Dál sávvá bearaš ahte doppe gearggašedje ášši meannudit ja ahte ON dorjjošii sin vuoigatvuođaid ovdal cuoŋománu. 

Ii leat luohttámuš stáhtii 

NSR sámepolitihkkár ja aktivista Beaska Niillas lea čuovvume gárddástallama. Lávvardaga maiddái NSR bovde olbmuid Fálesnuorrái doarjut Jovsset Ánte Sara ja seammás vuosttildit Nussir ruvkedoaimmaid. 

Norgga Sámediggepresideanta Aili Keskitalo lea ovdal lohkan ahte lea stuora paradoksa ahte eai čáhkket Jovsset Ánte Sara guohtuneatnamiidda, seammás go Ráđđehus suovvá Nussir ruvkedoaimmaid seamma guvlui. 

Beaska Niillas lea ráhkkaneame lávvardat doaluide seammás go fákte ahte eiseválddit eai boađe Fálá gárddástallamiidda. 

– Vaikko lohket ahte eai boađe, de stáhta lea stáhta. Daidda ii sáhte luohttit. Danne orun ain dáppe, jus dette ášši vuot jorggiha.Lea buorre go leat gávdnan gaskaboddosaš čovdosa, muhto ii han dat gaskaboddosaš čoavddus čoavdde ášši agibeaivái. Mii joatkit veahkeheames Jovsset Ánte ja geavahit resurssaid ja kanálaid mat mis leat, lohká son.

Dá lea ášši:
 

Jovsset Ánte Sara áššáskuhtii stáda go stáda mearridii boazologu geahpedeami oktavuođas ahte Jovsset Ánttes eai galgga go 75 heakka. Ášši lea jorran Norgga riektevuogádagas masá čieža jagi juo. Sara vuittii digge- ja lágamánnerievttis. Alimusriekti fas doarjjui stáda 2017. Sara de váiddii ášši ON Olmmošvuoigatvuođakomiteai. 
ON ii leat geargan vel árvvoštallat Sara ášši ja lea ávžžuhan Norgga maŋidit bággodoaimmaid dassái go komitea geargá bargguinis. Nuorta-Finnmárkku diggegoddi ii oaidnán dárbbu ON jeagadit ja celkkii borgemánu 13. beaivvi ahte stádas lea riekti fámuin njuovvat Jovsset Ánte Sara ealu. Dál jur ovdalaš bággodoaimmaid, de lea stáhta dohkkehan ahte Sara skeŋke bohccuid. Dasto lea Sara eallu sihkkarvuođas masá jagi vel, ovdalgo fas gártá gávdnat ođđa čovdosa.