Dávvet Bruun-Solbakk, gii válljejuvvui ođđa organisašuvnna jođiheaddji. Govva: Steve.Nilsen/ SÁPMI PRIDE preassagovva

Ásahedje ođđa organisašuvnna

Saepmie Pride Tråante oktavuođas ásahedje sámi homofiillat ođđa bonju-organisašuvnna. Ođđa organisašuvnna namma lea Garmeres - Queer Sámi Organisation.

– Garmeres lea máttasámi sátni ja mearkkaša “čeavlái”. Garmeres galgá bargat buot bonju-sámiid namas beroškeahttá riikkarájáin. Mii bargat iežamet vuoigatvuođaid ja vejolašvuođaid ovddas, seammás go dáhttut leat oidnosis miehtá Sámi, lohká Dávvet Bruun-Solbakk, gii válljejuvvui ođđa organisašuvnna jođiheaddji.


Dán jagi Sápmi Pride lágiduvvui Plassjes. Doaluid oktavuođas ásahedje ođđa sámi organisašuvnna, mii bargá beroškeahttá rájáin. Govat: Håkon Sandmo Karlsen/SÁPMI PRIDE preassagovat.

Juo dál almmuhit ahte boahtte jagi maid šaddet Sápmi Pride doalut, ja daid lágidit boahtte čavčča Ohcejogas. 

- Guokte maŋimuš jagi leat lágidan Sápmi Pride máttasámi gávpogiin. Dál illudat fas gilážiin lágidit doaluid. Dan botta go vuorddašat doaluid, de mii bargat iežamet organisašuvnna ovddas, earet eará bistevaš ruhtadeami ovdii, lohká Bruun-Solbakk.